ინფექციური საავადმყოფოს დირექტორი თენგიზ ცერცვაძე, რომელიც კორონავირუსის პრევენციისთვის შექმნილი კლინიკური ჯგუფის ხელმძღვანელია, განმარტავს, რომ ინფიცირებულ პაციენტს მედიკამენტ პლაქვენილს მწვავე რესპირაციული ინფექციის სიმპტომებისას აძლევენ. ასეთ სიმპტომებად კი ის ასახელებს:

  • ცხელება (ტემპერატურა) 38° და მეტი;
  • ძლიერი ხველა;
  • ძლიერი საერთო სისუსტე;
  • გონების დაბინდვა და შეცვლა;
  • რენდგენოლოგიური პნევმონია.

ცერცვაძის თქმით, რენდგენით დადგენილი პნევმონია ერთ-ერთი მთავარი სიმპტომია და ასეთ შემთხვევაში პაციენტი პლაქველინს ყველა მიზეზის გარეშე იღებს.

პლაქვენილით მკურნალობის საკითხი რამდენიმე დღეა აქტუალური განხილვის საგანი გახდა. აშშ-ში მოღვაწე ქართველმა ექიმმა, ზურაბ გურულმა განაცხადა, რომ ამ მედიკამენტს საქართველოში უსიმპტომო პაციენტებსაც აძლევენ, რაც არ შეიძლება. თენგიზ ცერცვაძემ უსიმპტომო პაციენტების ამ ფორმით მკურნალობა უარყო.

ასევე, ცერცვაძემ უარყო გავრცელებული ინფორმაცია იმაზე, რომ ერთ-ერთი უსიმპტომო პაციენტი, რომელსაც პლაქვენილით უმკურნალეს ამირან გამყრელიძის შვილი იყო. მისი თქმით, პაციენტს ორმხრივი პნევმონია ქონდა და ის 28 დღე მკურნალობდა კლინიკაში.