დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

პრემიერის მრჩეველის, სოზარ სუბარი განცხადებით, ქალაქ ბოლნისსა და სოფელ რაჭისუბანში გადაადგილება შეიზღუდა და საკარანტინო ზონად გამოიყო. მისი თქმით, ბოლნისი დღეს ერთ-ერთი ყველაზე მეტად დაზარალებული მხარეა და იქ 47 დაინფიცირებული ადამიანია.

"დღეს მივიღეთ გადაწყვეტილება, რომ თვითონ ქალაქი ბოლნისი და სოფელი რაჭისუბანი იქნა გამოყოფილი დანარჩენი მუნიციპალიტეტისგან. ეს გადაწყვეტილება განაპირობა იმან, რომ ქალაქ ბოლნისში დაინფიცირებულთა რიცხვი მკვეთრად გაიზარდა. რაც ყველაზე მნიშვნელოვანია, აქ დაინფიცირებულია არაერთი სამედიცინო პერსონალი", — თქვა სოზარ სუბარმა.

სოზარ სუბარის თქმით, რეგიონში შემოწმება, სკრინინგი და ტესტირება დაიწყება, რომ ყველა კერა აღმოიფხვრას. ერთმანეთში მიმოსვლა ქალაქ ბოლნისსა და რაჭისუბანს შორისაც შეზღუდული იქნება. მინისტრის თქმით, ადგილზე 5 ბლოკპოსტია განთავსებული.

სუბარის განცხადებით, კიდევ ერთი საკარანტინო ზონა კაზრეთი და ბალიჭებია. მისი განმარტებით, ადგილზე არემჯი გოლდი მუშაობს და რადგან ბევრი ადამიანი ერთადაა, ცდილობენ ვირუსის გავრცელების თავიდან აიცილონ.

საგანგებო მდგომარეობის ფარგლებში დაწესებული ახალი შეზღუდვებით, ქვეყნის მასშტაბით სასაფლაოები დაიკეტა. ახალი შეზღუდვებით, აკრძალულია ნებისმიერი მსუბუქი ავტომობილით გადაადგილება, მათ შორის ტაქსითაც. ასევე, სავალდებულო გახდა პირბადის ტარება. საპატრიარქომ ამ თემასთან დაკავშირებით განცხადება გაავრცელა და თქვა, რომ მთავრობასთან ეს შეზღუდვა დააზუსტეს. მათი ინფორმაციით, სასულიერო პირებს, მგალობლებსა და სტიქაროსნებს გადაადგილების პრობლემა არ ექნებათ.

ბოლო მონაცემებით, საქართველოში კორონავირუსის 370 დადასტურებული შემთხვევაა, მათგან გამოჯანმრთელებულია 79 ადამიანი, ხოლო გარდაცვლილია 3. კარანტინის რეჟიმში 5 035 პირი რჩება, სტაციონარში მეთვალყურეობის ქვეშ კი 540 პაციენტი.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: