დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

საგანგებო მდგომარეობის ფარგლებში დღეს, 17 აპრილის 12 საათიდან საქართველოში საკარანტინო პირობები მკაცრდება. კერძოდ, სრულად აიკრძალება მსუბუქი ავტომობილებით გადაადგილება და დახურულ სივრცეეში პირბადეების ტარება სავალდებულო ხდება.

რისი უფლება აქვთ მოქალაქეებს და როგორ უნდა მოიქცნენ ისინი კონკრეტული საჭიროების შემთხვევაში, ამ კითხვებს მთავრობა პასუხობს.

რომელი სატრანსპორტო საშუალებით გეზღუდებათ გადაადგილება და რით შეგიძლიათ სარგებლობა

იკრძალება გადაადგილება ყველა სახის მექანიკური სატრანსპორტო საშუალებით, გარდა მოტოციკლისა. ასევე, არ იკრძალება მოპედით და ველოსიპედით გადაადგილება.

შეზღუდვა ეხება ტაქსით გადაადგილების მომსახურებასაც.

როგორ შეგიძლიათ მოიპოვოთ საშვი მანქანით გადაადგილებისთვის

იმ შემთხვევაში, თუ თქვენ ეწევით დასაშვებ ეკონომიკურ საქმიანობას, საშვის მოსაპოვებლად უნდა მიმართოთ დარგობრივ სამინისტროს (მაგალითად: სოფლის მეურნეობის ან ეკონომიკის სამინისტრო).

თუ თქვენ ეწევით ისეთ საქმიანობას, რომელზე ზედამხედველობასაც არ ეწევა არცერთი დარგობრივი სამინისტრო და თქვენი გადაადგილება, საქმიანობიდან გამომდინარე, წარმოადგენს უკიდურეს აუცილებლობას, უნდა დარეკოთ ცხელ ხაზზე — 144.

როგორ უნდა მიხვიდეთ ან უზრუნველყოთ თანამშრომლების სამსახურამდე მიყვანა, თუ მუშაობის უფლება გაქვთ

თუ დაშვებული ეკონომიკური საქმიანობის ფარგლებში მუშაობთ, თქვენი გადაადგილება საცხოვრებლიდან სამსახურამდე და პირიქით, უნდა უზრუნველყოს თქვენმა დამსაქმებელმა.

სუბიექტი ვალდებულია, უზრუნველყოს თანამშრომელთა გადაადგილება M2(მიკროავტობუსით) და M3(ავტობუსით) კატეგორიების ავტოსატრანსპორტო საშუალებით. აღნიშნული ნებართვის მისაღებად, კომპანიამ უნდა მიმართოს შესაბამის მუნიციპალიტეტს. მუნიციპალიტეტი უზრუნველყოფს M2 და M3 კატეგორიის ავტოსატრანსპორტო საშუალებებით მგზავრთა გადაყვანის მიზნით მარშუტების განსაზღვრას, ოპერაციულ შტაბთან შეთანხმებით.

როგორ უნდა გადაადგილდეთ სამედიცინო მომსახურების მისაღებად

სამედიცინო მომსახურების მიღების მიზნით გადაადგილება დასაშვებია. თუ თქვენ გაქვთ სამედიცინო მომსახურების მიღების აუცილებლობის აშკარა ნიშნები (მაგ.: დაგეწყოთ მშობიარობა, გაქვთ მოტეხილობა და ა.შ.), ნებადართულია გადაადგილება სამედიცინო მომსახურების მისაღებად (თანმხლებ პირთან ერთად).

თუ გჭირდებათ აუცილებელი გეგმიური სამედიცინო მომსახურების მიღების მიზნით (მაგ.: დიალიზი, ონკოლოგიური მკურნალობა და ა.შ.) გადაადგილება, თან უნდა იქონიოთ სამედიცინო დაწესებულების მიერ გაცემული ცნობა.

იმ შემთხვევაში, თუ არ გაქვთ მსგავსი ცნობა, უნდა დაუკავშირდეთ მკურნალ ექიმს/სამედიცინო დაწესებულებას, რომელიც, თავის მხრივ, მიზანშეწონილობის გათვალისწინებით, ჯანდაცვის სამინისტროს ელექტრონულად აწვდის შესაბამის ინფორმაციას. აღნიშნულის საფუძველზე, თქვენზე გაიცემა მიზნობრივი გადაადგილების ელექტრონული ნებართვა. ელექტრონული ფორმით ცნობის ვერმიღების პირობებში, ცნობის მისამართზე მიტანას უზრუნველყოფს სსიპ - სოციალური მომსახურეობის სააგენტოს რაიონული განყოფილება.

შეგიძლიათ თუ არა სასურსათო პროდუქტის ან/და ფარმაცევტული პროდუქტის გამოძახება

საკვები პროდუქტის, სურსათისა და სამედიცინო დანიშნულების საქონლის/პროდუქტის მიტანის მომსახურების გაწევის მიზნით გადაადგილება დასაშვებია. შესაბამისად, შეგიძლიათ ისარგებლოთ ე.წ. „დელივერი“ სერვისით.

შეგიძლიათ თუ არა სასაფლაოზე წასვლა

საქართველოს მასშტაბით, იკრძალება სასაფლაოს ტერიტორიაზე შესვლა. აკრძალვა არ ეხება მხოლოდ მიცვალებულის დაკრძალვასთან დაკავშირებული ღონისძიებების განხორციელების მიზნით სასაფლაოს ტერიტორიაზე შესვლასა და გადაადგილებას.

რომელ დაწესებულებებში გაქვთ პირბადის ტარების ვალდებულება

პირბადის ტარების ვალდებულება გაქვთ ყველა დახურულ საჯარო სივრცეში (მაგ.: აფთიაქში, სასურსათო მაღაზიაში და სხვ.).

შეგიძლიათ თუ არა გადაადგილება სასოფლო-სამეურნეო საქმიანობის განსახორციელებლად

სასოფლო-სამეურნეო საქმიანობის განსახორციელებლად დაშვებულია მხოლოდ სასოფლო-სამეურნეო დანიშნულების მანქანის ან ტექნიკის გადაადგილება (მაგ.: ტრაქტორი, კომბაინი და სხვ.). სხვა სახის მექანიკური სატრანსპორტო საშუალებით გადაადგილება აკრძალულია.

როცა სამსახურებრივი მიზნით ავტომანქანით გადაადგილების უფლება გაქვთ, შეგიძლიათ თუ არა ამ ავტოსატრანსპორტო საშუალებით, ოჯახის წევრის ან სხვა პირის გადაყვანა

არა. ავტოსანტრანსპორტო საშუალებით უნდა გადაადგილდეთ მხოლოდ თქვენ, სამსახურებრივი მიზნით და მგზავრთა განთავსების წესების დაცვით, გაქვთ თანამშრომლის სამსახურში გადაყვანის უფლება.

საქართველოში დაწესებულია კარანტინი და ე.წ. კომენდანტის საათი. აქამდე არსებული შეზღუდვებით, სავალდებულოა, ორმეტრიანი სოციალური დისტანციის დაცვა, აკრძალულია 3-ზე მეტი ადამიანის შეკრება და 21:00 საათის შემდეგ სახლიდან გარეთ გასვლა. თუმცა, სახელმწიფო ამ წესებს არ ავრცელებს მართლმადიდებელ მრევლზე, რომელიც ეკლესიებში მაინც იკრიბება.

ბოლო მონაცემებით, საქართველოში კორონავირუსით ინფიცირებულია 370 ადამიანი, მათ შორის გარდაცვლილია 3 ადამიანი, გამოჯანმრთელდა — 77. უცხოეთიდან სამკურნალოდ გადმოყვანილი საქართველოს მოქალაქეები — 3, კარანტინის რეჟიმში 5 079 პირი რჩება, სტაციონარში მეთვალყურეობის ქვეშ კი 558.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: