დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

მღვდელი შალვა კეკელიას მტკიცებით, ღმერთმა 9 აპრილი და 13 ივნისი იმიტომ "დაუშვა", რომ დაგვაფიქროს. მისი თქმით, ღმერთი განსაცდეს უშვებს ადამიანებზე, რადგან სხვანაირად ადამიანის დაფიქრება ძალიან ძნელია. ამ თემაზე შალვა კეკელიამ იმედის ეთერში ისაუბრა.

"ღმერთი განსაცდელს უშვებს ჩვენზე, რომ დაგვაფიქროს. ჩვენ გვახსოვს 9 აპრილი, რომელიც იყო უმძიმესი მდგომარეობა, ახალგაზრდები დაიღუპნენ, უამრავი ადამიანი დაშავდა, მაგრამ შედეგად რა მოიტანა ამან, ქვეყნის გაერთიანება, ერთ აზრზე მოყვანა ადამიანებისა, დაფიქრება, ღირებულებების შესვლა. თბილისში გვქონდა ჩვენ 13 ივნისი, როდესაც ამხელა სტიქია დაატყდა მთელ ქალაქს თავს, ძალიან ბევრი ადამიანი დაიღუპა. რა მოხდა ამ დროს, აზროვნებით, ფიქრით დაშორიშორებული ადამიანები ერთად ვიდექით და ვასუფთავებდით ქალაქს", — თქვა შალვა კეკელიამ.

მღვდელი შალვა კეკელიას თქმით, როდესაც ადამიანი რაღაც მტკივნეულს ეხება იმ მომენტში ადამიანი სხვანაირად იწყებს ფიქრს.

დღეს, 15 აპრილს სახელმწიფომ და საპატრიარქომ გადაწყვიტეს, რომ საგანგებო მდგომარეობისა და კომენდანტის საათის მიუხედავად აღდგომის ლიტურგიას მრევლი დაესწრება. საპატრიარქოს პრესსპიკერის, ანდრია ჯაღმაიძის თქმით, დიდ ეკლესიებში ორი მეტრის დისტანცია იქნება დაცული, პატარა ტაძრებში კი მრევლი ეზოში განაწილდება. მისი განმარტებით, მრევლი ეკლესიაში კომენდანტის საათის დაწყებამდე მივა და დილის 6 საათზე წამოვა. პრემიერ-მინისტრის პრესსპიკერის, ირაკლი ჩიქოვანის განცხადებით, ეკლესიებთან მობილიზებული იქნება პოლიცია.

ბოლო მონაცემებით, საქართველოში კორონავირუსით ინფიცირებულია 306 ადამიანი, მათ შორის გამოჯანმრთელებულია 71, ხოლო გარდაცვლილია 3 ადამიანი. კარანტინის რეჟიმში 4 990 პირი რჩება, სტაციონარში მეთვალყურეობის ქვეშ კი 462.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: