ბავშვებთან კონტაქტით ადრე არასდროს გამოვირჩეოდი. პირიქით, შეიძლება ითქვას, რომ ამ საკითხში ძალიან მოვიკოჭლებდი — უბრალოდ არ ვიცოდი, როგორ მესაუბრა მათთან და ამის გამოსწორებაზე დიდად არც ვფიქრობდი.

თუმცა, მას შემდეგ, რაც ჩემს ცხოვრებაში აგატა გაჩნდა, ყველაფერი რადიკალურად შეიცვალა. ახალი ეტაპი დაიწყო… ბევრი რამ გადავაფასე და გაჩნდა შეგრძნებები, რომელიც მანამდე არ მქონია.

ფოტო: UNFPA

რთულია ამ გიჟური გრძნობების სიტყვებით გადმოცემა და არც ვეცდები, რადგან ზუსტად ვიცი, რომ ვერ შევძლებ. ერთადერთი, იმას ვიტყვი, რომ გრძნობა, რომელიც შენი შვილის მიმართ გიჩნდება, მილიონ პატარ-პატარა მოლეკულურ გრძნობებს აერთიანებს. ვფიქრობ, სწორედ ამიტომ არის ეს უნიკალური — ადრეც ხშირად მომისმენია მეგობრებისგან, რომ სანამ შვილი არ გეყოლება, ამას ვერ მიხვდები. მიუხედავად იმისა, რომ ამ სიტყვებს მაშინ არაფრად ვთვლიდი, ახლა ვხვდები, რომ სრული ჭეშმარიტებაა.

ჩემი და აგატას ურთიერთობა დაფუძნებულია ურთიერთგაგებაზე. მიუხედავად იმისა, რომ მისი ლექსიკონი მხოლოდ 12 სიტყვით შემოიფარგლება, ყველაფერს მაგებინებს და მიხსნის. მეც სულ პატარაობიდან ვცდილობ დეტალურად ავუხსნა ყველაფერი და მაქსიმალურად დადებითი როლი ვითამაშო მის სწორად განვითარებაში. მე და აგატა სოულმეითები ვართ და მთელ ცხოვრებას ასე გავატარებთ.

ფოტო: UNFPA

2020 წელი კაცობრიობისთვის დიდი გამოწვევით დაიწყო, მთელი მსოფლიო ერთმა პრობლემამ გაგვაერთიანა. Covid-19-ის გავრცელებამ ცხოვრების ჩვეული რიტმიდან ამოგვაგდო, ყველანი სახლებში გამოგვკეტა. თუმცა, ჩემთვის ამ ფაქტს, დადებითი მხარეც აქვს, ერთგვარი საჩუქარიცაა, რადგან საშუალება მაქვს ჩემს შვილთან მთელი 24 საათი გავატარო, მქონდეს ფუფუნება, რომ მის ყოველ ახალ ქცევას თვალი ვადევნო, აქტიური მონაწილეობა მივიღო მის განვითარებაში.

ჩვენი აქტივობების ნუსხა მრავალფეროვანია: ხატვა, გასაფერადებლები, წიგნები, ფიგურებით თამაში, კულინარია და სხვა. ამჯერად სახლში ხელმისაწვდომი მასალებისგან ხელნაკეთი აქსესუარების დამზადება გადავწყვიტეთ. როცა რამეს ერთად ვაკეთებთ, ვცდილობ, აგატას სურვილების გამოხატვის შესაძლებლობა მივცე და მე უბრალოდ დავეხმარო განხორცილებაში. აი, მაგალითად, ამ გვირგვინზე ბურთების ფერები მისი შერჩეულია.

ფოტო: UNFPA

ხელნაკეთი აქსესუარებისთვის გამოვიყენეთ:

  • საპირფარეშოს ქაღალდის მუყაოს გრაგნილი
  • დეკორატიული "სკოჩი"
  • ორმაგი "სკოჩი"
  • მაკრატელი
  • თექის ქსოვილი
  • დეკორატიული ბურთები, ქსოვილისგან დამზადებული
  • ფერადი ლენტი
  • ცხელი სილიკონის თოფი

ფოტო: UNFPA

ფოტო: UNFPA

წარმატებებს გისურვებთ! მე და აგატას ეს პროცესი ძალიან მოგვეწონა.

კამპანია "კაცები ზრუნავენ" ხორციელდება გაეროს მოსახლეობის ფონდის (UNFPA) საქართველოს ოფისისა და არასამთავრობო ორგანიზაცია "Care Together"-ის მიერ, გაეროს ერთობლივი პროგრამის "გენდერული თანასწორობისათვის" ფარგლებში, შვედეთის მთავრობის ფინანსური მხარდაჭერით.