დღეს Freedom House-მა გამოაქვეყნა სია, რომელშიც ასახულია ქვეყნებში არსებული მდგომარეობა ინტერნეტის თავისუფლების კუთხით მსოფლიო მასშტაბით.

"2016 წლის მონაცემებით, საქართველო თავისუფალი ქვეყნის პოზიციას ინარჩუნებს, თუმცა YouTube-სა და WordPress-ის დროებით დაბლოკვის გამო, მისი ქულა შემცირებულია" - წერია ანგარიშში.

2016 წელს საქართველოს მინიჭებული აქვს 25 ქულა, 2015 წელს ეს მაჩვენებელი 24 ქულა იყო. საუკეთესო მაჩვენებელი ამ რეიტინგში 0 ქულაა.

საქართველოს მეზობელი ქვეყნებიდან, ინტერნეტის შეუზღუდავობის კუთხით, თავისუფალი ქვეყნების კატეგორიაში მხოლოდ სომხეთი გადის, თუმცა მისი ქულებიც შემცირებულია მას შემდეგ, რაც პოლიცია ჟურნალისტებს ერევანში გამართული აქციების პირდაპირ ეთერში გადაცემისას თავს დაესხა.

ანგარიშის მიხედვით, აზერბაიჯანი ნაწილობრივ თავისუფალი ქვეყნების კატეგორიაში გადის, რუსეთი და თურქეთი კი არათავისუფალი ქვეყნების კატეგორიაში არიან.

WordPress.com საქართველოში 2015 წლის 25 ნოემბერს დროებით დაიბლოკა, რისი მიზეზიც სავარაუდოდ ისლამურ სახელმწიფოსთან დაკავშირებული ვებგვერდის დაბლოკვა გახდა. ნეტგაზეთის ინფორმაციით, ისლამურ სახელმწიფოსთან აფილირებული საიტი სახელმწიფო უსაფრთხოების სამსახურის ინიციატივით დაიბლოკა, თუმცა უცნობი იყო, რატომ მოჰყვა ამას Wordpress-ის ჰოსტინგზე არსებული სხვა ვებგვერდების დაბლოკვაც.

ვორდპრესის ქართველი მომხმარებლის საბა ლეკვეიშვილის მიერ მიმართვის შემდეგ, საიტი საქართველოს მთავრობას ტვიტერით გამოეხმაურა:

"გამარჯობა საქართველოს მთავრობა. საქართველოში WordPress.com-ის დაბლოკვის თაობაზე გწერთ, შეგიძლიათ თქვენი იმეილი შეამოწმოთ?"

YouTube-ის მთელი კონტენტი მარტში საქართველოში ორჯერ დაიბლოკა ერთი კონკრეტული ვიდეოს გამო. ერთ შემთხვევაში, ის სავარაუდოდ ერთ-ერთი ოპოზიციონერი პოლიტიკოსის პირადი ცხოვრების ამსახველი კადრების გავრცელებას უკავშირდებოდა.

ორგანიზაციას რეპორტიორები საზღვრებს გარეშე (RSF) საქართველოს მეზობელი ქვეყნების პირველი პირები მედიის მტრების სიაში ჰყავს შეყვანილი.