ქართული ოცნება "საერთაშორისო გამჭვირვალობა — საქართველოს" განცხადებას გამოეხმაურა და მათ სიცრუის გავრცელებაში დებს ბრალს. პარტიის განცხადებით, ქართული ოცნების საპატიო წევრი ბიძინა ივანიშვილი არ არის ვალდებული მისი ქონებრივი დეკლარაცია წარადგინოს. ოცნების განცხადებით, 2024 წლის 10 დეკემბერს, ბიძინა ივანიშვილს "მისივე მიმართვის საფუძველზე" უფლებამოსილება შეუწყდა — შესაბამისად მისი მისი საჯარო დაწესებულებაში მუშაობის პერიოდი 2 თვეს არ აღემატებოდა. შემდეგ პარტიამ განცხადებაში დასძინა, რომ საქართველოს კანონმდებლობით, პირს აღარ ევალება ქონებრივი დეკლარაციის წარდგენა, თუ მისი "უფლებამოსილების შეწყვეტის პერიოდი არ აღემატება 2 თვეს".

"გვსურს გამოვეხმაუროთ "საერთაშორისო გამჭვირვალობა — საქართველოს" მიერ გავრცელებულ მორიგ დეზინფორმაციას, რომლის თანახმად, ქართული ოცნების საპატიო თავმჯდომარეს, ბიძინა ივანიშვილს, ქონებრივი დეკლარაციის შევსების ვალდებულება 2024 წლის საპარლამენტო არჩევნების შემდეგ, დეპუტატად მცირე ხნით ყოფნის გამო წარმოეშვა და ამის მიუხედავად, მისი დეკლარაცია, დეკლარაციების ვებგვერდზე არ იძებნება.
საზოგადოების ინფორმირების მიზნით განვმარტავთ, რომ ბიძინა ივანიშვილმა, ქონებრივი დეკლარაცია, რომლის შევსების ვალდებულება მას, როგორც 2024 წლის საპარლამენტო არჩევნების დროს, პარლამენტის წევრობის კანდიდატს დაეკისრა, 2024 წლის 4 ოქტომბერს შეავსო. ბიძინა ივანიშვილის, როგორც პარლამენტის წევრობის კანდიდატის მიერ შევსებული დეკლარაცია ანტიკორუფციული ბიუროდან რადიო თავისუფლებამაც გამოითხოვა და ამ თემას 2024 წლის 31 ოქტომბერს სტატიაც მიუძღვნა, სათაურით — "ივანიშვილის ოჯახის დეკლარირებული ქონება: საქართველოში, რუსეთსა და საფრანგეთში".

რაც შეეხება "საერთაშორისო გამჭვირვალობა — საქართველოს" მტკიცებას, რომ ქონებრივი დეკლარაციის შევსების ვალდებულება, ბიძინა ივანიშვილს "არჩევნების შემდეგ მცირე ხნით პარლამენტის წევრად ყოფნის გამო წარმოეშვა", ორგანიზაციას შევახსენებთ, რომ "კორუფციის წინააღმდეგ ბრძოლის შესახებ" საქართველოს კანონის შესაბამისად, "პირი ვალდებულია თანამდებობაზე განწესებიდან ორი თვის ვადაში წარადგინოს ანტიკორუფციულ ბიუროში თანამდებობის პირის ქონებრივი მდგომარეობის დეკლარაცია." ასევე, "კორუფციის წინააღმდეგ ბრძოლის შესახებ საქართველოს კანონის" შესაბამისად, პირი თავისუფლდება დეკლარაციის წარდგენის ვალდებულებისაგან თუკი მას საჯარო დაწესებულების სისტემაში დაკისრებული აქვს თანამდებობის პირის მოვალეობის შესრულება არაუმეტეს 2 თვის ვადით.

ამავე კანონის თანახმად, "საქართველოს პარლამენტის წევრობის კანდიდატი ვალდებულია პარლამენტის წევრობის კანდიდატად რეგისტრაციიდან 1 კვირის ვადაში, საქართველოს მთავრობის მიერ დადგენილი გამარტივებული ფორმით შეავსოს და წარადგინოს თანამდებობის პირის ქონებრივი მდგომარეობის დეკლარაცია, გარდა იმ შემთხვევისა, თუ, ამ მუხლის თანახმად, მას იმ წელს შევსებული აქვს დეკლარაცია".

კანონში არსებული ზემოაღნიშნული დათქმებიდან გამომდინარე, ნათელია, რომ არასამთავრობო ორგანიზაცია "საერთაშორისო გამჭვირვალობა — საქართველო" სიცრუეს ავრცელებს. მე-11 მოწვევის პარლამენტმა, 2024 წლის 25 ნოემბერს გამართულ პირველ სხდომაზე, დეპუტატების, მათ შორის, ქართული ოცნების სიის პირველი ნომრის, ბიძინა ივანიშვილის უფლებამოსილება ცნო, რომელიც მას ამავე წლის 10 დეკემბერს, მისივე მიმართვის საფუძველზე შეუწყდა. შესაბამისად, ბიძინა ივანიშვილის მიერ თანამდებობის დაკავება, მისთვის უფლებამოსილების შეწყვეტის პერიოდი არ აღემატება 2 თვეს.
შესაბამისად, "საერთაშორისო გამჭვირვალობა — საქართველო" მორიგ ჯერზე ცდილობს, სპეკულაციური განცხადებებით საზოგადოების შეცდომაში შეყვანას და სიცრუის ტირაჟირებას," — ვკითხულობთ განცხადებაში.

ქართული ოცნების ამ განცხადებას "საერთაშორისო გამჭვირვალობა — საქართველოს" უპასუხა. ორგანიზაციის განცხადებით, ქართული ოცნება არც ცდილობს იმ ფაქტის უარყოფას, რომ ბიძინა ივანიშვილი მოქალაქეებს თავისი ქონების დეკლარაციას "უმალავს". ორგანიზაციამ ასევე დასძინა, რომ პარტიის მოყვანილი არგუმენტი 2 თვის საჯარო სამსახურზე სიცრუეა, რადგან "დეკლარაციის ვალდებულებისგან გათავისუფლება ვრცელდება მხოლოდ იმ შემთხვევაზე, როდესაც პირი დროებით ასრულებს იმავე საჯარო დაწესებულების სისტემაში ფუნქციას, ანუ ხდება თანამდებობაზე დროებითი შიდა ჩანაცვლება. ეს გამონაკლისი არ ვრცელდება იმ შემთხვევაზე, როდესაც პირი სრულიად ახალ თანამდებობაზე ინიშნება ან ირჩევა, თუნდაც მცირე ვადით".

შეგახსენებთ, "საერთაშორისო გამჭვირვალობა — საქართველოს" განცხადებით, 2024 წლის ბოლოს ბიძინა ივანიშვილს ქონებრივი დეკლარაციის შევსება უწევდა, რომელიც დეკლარაციების ვებგვერდზე არ იძებნება. ორგანიზაციამ ასევე დასძინა, რომ ივანიშვილის მსგავსად ირაკლი ღარიბაშვილიც მცირე ხნით იყო პარლამენტის წევრი, მაგრამ მისი ქონებრივი დეკლარაცია საიტზე მოიძებნება.

"ოლიგარქ ბიძინა ივანიშვილს 2024 წლის ბოლოს ქონებრივი დეკლარაციის შევსება უწევდა. ეს ვალდებულება მას არჩევნების შემდეგ მცირე ხნით პარლამენტის წევრად ფორმალურად ყოფნის გამო წარმოეშვა. დოკუმენტი არ იძებნება დეკლარაციების ვებგვერდზე. ანტიკორუფციულმა ბიურომ არც საჯარო ინფორმაციის გამოთხოვის შედეგად მოგვაწოდა ის.

შედარებისთვის, ირაკლი ღარიბაშვილის დეკლარაცია, რომელიც ასევე მცირე ხნით ფორმალურად იყო პარლამენტის წევრი, ვებგვერდზე ხელმისაწვდომია. არსებობს იმის ალბათობაც, რომ ოლიგარქმა ივანიშვილმა საერთოდ არ შეავსო დეკლარაცია.
რაჟდენ კუპრაშვილი, რომელმაც სამოქალაქო საზოგადოების რეპრესიების შემსრულებლის როლი შეითავსა, უფლებადამცველი ორგანიზაციებისგან უკანონოდ ითხოვს მათი დაცვის ქვეშ მყოფი მოქალაქეების პერსონალურ ინფორმაციას მაშინ, როცა ქონებისა და კავშირების დეკლარირებისა და ამ ინფორმაციის გასაჯაროების კანონით მკაფიოდ გაწერილ ვალდებულებას უხსნის ამ რეპრესიების დამკვეთ ივანიშვილს," — წერს ორგანიზაცია.

ცნობისთვის, "საერთაშორისო გამჭვირვალობა — საქართველოს" იმ 5 ორგანიზაციის შორისაა, რომელთაც რაჟდენ კუპრაშვილის "ანტიკორუფციულმა ბიურომ" სასამართლოს განჩინებით მიმართა და ორგანიზაციის ბენეფიციარების პირადი ინფორმაციის გადაცემა მოითხოვა.