დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

სახელმწიფო დაცვის სამსახურის ინფიცირებული თანამშრომელი, რომელიც საპატრიარქოს შენობას იცავს, ამბობს, რომ ორი კვირის განმავლობაში მისი კონტაქტების წრე საკმაოდ დიდია.

პაციენტმა TV პირველთან საუბარში აღნიშნა, რომ მისი ინფიცირების წყარო უცნობია. მისი თქმით, ორი კვირის განმავლობაში იმყოფებოდა სოფელშიც, ხოვლეში, დადიოდა მაღაზიებსა და აფთიაქებში. რაც შეეხება საპატრიარქოს, პაციენტის ინფორმაციით, აქ ბოლოს ორი დღის წინ იმყოფებოდა.

ის ვარაუდობს, რომ მისი ინფიცირების წყარო საპატრიარქო არ არის.

"საპატრიარქოში უფრო არა, იმიტომ რომ იქ დაცულები ვართ და სიცხეს ვუზომავთ თუ ვინმე შედის, იქაც კარანტინია, არ შედის ზოგადად ხალხი, არ გვაქვს ბევრ ხალხთან ურთიერთობა. საპატრიარქოს უფრო გამოვრიცხავ. ალბათ ან მაღაზია, ან აფთიაქი, სადაც ვმოძრაობ სხვაგან", — აღნიშნა პაციენტმა.

ჟურნალისტის კითხვას, ჰქონდა თუ არა კონტაქტი სასულიერო პირებთან და სინოდის წევრებთან, ის უარყოფითად პასუხობს და აღნიშნავს, რომ ორი კვირის განმავლობაში საპატრიარქოში სულ ორჯერ იმყოფებოდა და მათთან კომუნიკაცია არ ჰქონია.

დაცვის თანამშრომელის კორონავირუსით ინფიცირების შესახებ ინფორმაცია დღეს გავრცელდა. სახელმწიფო დაცვის სამსახუში On.ge-ს უთხრეს, რომ მიმდინარეობს კონტაქტების მოკვლევა და სხვა თანამშრომლები დაკვირვების ქვეშ არიან.

ინფორმაცია იმის შესახებ, რომ სასულიერო პირს კორონავირუსი აქვს, გუშინ, 13 აპრილს გავრცელდა და ოფიციალურად დღეს დაადასტურეს. ის კლინიკაში ოჯახის ორ წევრთან ერთადაა მოთავსებული.

პირველ აპრილს პატრიარქმა ილია მეორემ გაავრცელა მიმართვა, რომლის თანახმადაც, ტაძრის კარის დახურვა შეუძლებელია და ღია იქნება მათთვის, ვინც ეკლესიაში მისვლას მოისურვებს, შესაბამისად ჩატარდება სააღდგომო ლიტურგიაც. ტაძრებში წირვა-ლოცვების ჩატარებისთვის კი სასულიერო პირებს სამი რეკომენდაცია სმს-თი გაუგზავნეს.

12 აპრილს ცნობილი გახდა, რომ მართლმადიდებელ ეკლესიებში სააღდგომო ღვთისმსახურებას კომენდანტის საათის დროს ჩაატარებენ.

სამთავრობო გუნდი ისევ აცხადებს, რომ საკარანტინო შეზღუდვები ეხება ყველას და სააღდგომო ლიტურგიაზე შეკრებაც საკომენდანტო საათის დარღვევა იქნება, თუმცა 3-ზე მეტი ადამიანის შეკრებისთვის ეკლესიაში არავინ დაუჯარიმებიათ.

ბოლო მონაცემებით, საქართველოში კორონავირუსით ინფიცირებულია 296 ადამიანი, მათგან გამოჯანმრთელებულია 68, ხოლო გარდაცვლილი — 3. კარანტინის რეჟიმში 4 834 ადამიანი იმყოფება, სტაციონარში მეთვალყურეობის ქვეშ კი 434.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: