ამერიკის შეერთებული შტატები რუმინეთში სახმელეთო ანტისარაკეტო თავდაცვის სადგურს გაააქტიურებს, რომელიც ევროპის საჰაერო დაცვაში დიდ როლს ითამაშებს. ინფორმაციას BBC ავრცელებს.

ამერიკისა და ნატოს ოფიციალური პირებს დევესელუში, სამხრეთ რუმინეთში, საჰაერო ბაზის გახსნის ცერემონიაზე ელოდებიან. მათ შორის იქნება ნატოს გენერალური მდივანი იენს სტოლტენბერგი.

ამერიკული მხარის წარმომადგენლების თქმით, სისტემა განკუთვნილია პატარა და საშუალო ზომის რაკეტებისგან ნატოს ტერიტორიის დასაცავად, განსაკუთრებით ახლო აღმოსავლეთიდან.

ფაქტს რუსეთი სერიოზულ საფრთხედ აფასებს, თუმცა ნატო აცხადებს, რომ საჰაერო თავდაცვის სისტემის სხვა საფრთხეების გასანეიტრალებლად შეიქმნა. BBC-ის ინფორმაციით, აშშ-მ აღნიშნული საჰაერო თავდაცვის სისტემის მოსაწყობად 2013 წლიდან $800 მილიონი დახარჯა.

დასავლეთსა და რუსეთს შორის ურთიერთობა განსაკუთრებით მას შემდეგ გაუარესდა, რაც 2014 წელს რუსეთმა უკრაინის სამხრეთით ყირიმის ანექსია მოახდინა.