კანონი ყველასთვის ერთი უნდა იყოს, იქნება სასულიერო პირი, მრევლი თუ ათეისტი

ლელოს დამფუძნებელი, მამუკა ხაზარაძე მიიჩნევს, რომ ქვეყანაში კანონი ყველაზე ერთნაირად უნდა მოქმედებდეს. ამის შესახებ მან On.ge-სთან განაცხადა.

მისი თქმით, საგანგებო მდგომარეობის პირობების დაცვა სახელმწიფომ გამონაკლისების გარეშე უნდა უზრუნველყოს და იმ შემთხვევაში, თუ გამონაკლისებს დაუშვებს, ეს არა ორმაგი სტანდარტით, არამედ, გასაგები მიზეზებით უნდა მოხდეს.

"სასულიერო პირიც და მრევლიც არის საქართველოს მოქალაქე, შესაბამისად, ხელისუფლება როცა იღებს კანონს, ყველა ვალდებულია დაემორჩილოს. ხელისუფლებამ უნდა დაამყაროს ეს წესრიგი და თუ ვერ ამყარებს, ეს მისი პრობლემაა. თუ ვინმე არღვევს კანონს, არ აქვს მნიშვნელობა, სასულიერო პირი იქნება, მრევლი თუ ათეისტი... თუ წითელზე გაივლის მანქანა, რომელზეც ზის სასულიერო პირი, ხომ დააჯარიმებენ? თუ გვინდა სახელმწიფო გვქონდეს, კანონი ყველასთვის უნდა იყოს ერთი", — ამბობს ის.

ხაზარაძე საუბრობს საგანგებო მდგომარეობის გამოცხადების დროს პრემიერმინისტრისა და პარლამენტის თავმჯდომარის ურთიერთგამომრიცხავ განცხადებებზე, როცა გახარიამ თქვა, რომ ახალი წესები ყველას ეხება, თალაკვაძემ კი აღნიშნა, რომ რწმენისა და აღმსარებლობის უფლების შეზღუდვაზე დეკრეტში საუბარი არ არის.

"ეს ნიშნავს, რომ მათ ვერ გაითვალისწინეს ეს მდგომარეობა, ვერ დაამყარეს სწორი კომუნიკაცია ეკლესიასთან, ვერ აუხსნეს საშიშროების თემა. ექიმებმაც, რომლებსაც ჩვენ ვენდობით და ვუყურებთ, მკაფიოდ არ ჩამოაყალიბეს თავიანთი პოზიცია, ბევრი ენის მოჩლექვა იყო და ა.შ. კანონი ყველასთვის უნდა იყოს კანონი, თუ რამე გამონაკლისია, ეს უნდა იყოს გასაგები გამონაკლისი ყველასთვის. უპირველეს ყოვლისა, ამაზე პასუხისმგებელი არის სახელმწიფო. მან უნდა მოაგვაროს ეს ეკლესიასთან, ბიზნესსა თუ სუპერმარკეტთან, მან უნდა დაალაგოს ის უსაფრთხოების ზომები, რომლებიც ადამიანების დაიცავს, რომ მათ ჯანმრთელობას საფრთხე არ შეექმნას", — ამბობს ხაზარაძე On.ge-სთან.

კითხვას, აქვს თუ არა თავისი წილი პასუხისმგებლობა მრევლზე ეკლესიას, ხაზარაძე პასუხობს, რომ ხელისუფლების სხვადასხვა წარმომადგენლის განსხვავებული მოსაზრებები სასულიერო პირების ნაწილმა კარგად ვერ გაიგო და ეს განცხადებები მკაფიო უნდა ყოფილიყო.

"ხელისუფლებამ ისეთი გაუგებარი, ორმაგი სტანდარტის განცხადებები გააკეთა, რომ ზოგმა სასულიერო პირმა კარგად გაიგო, ზოგმა ვერ გაიგო და თქვა, რომ "მერე რა მოხდა". ზოგი სუპერმარკეტს ადარებს ამ სიტუაციას. ახსნა-განმარტება, მკაცრად და მკაფიოდ გამოსვლა ამასთან დაკავშირებით არ ყოფილა. მე არ ვემხრობი იმას, როცა ამბობენ, რომ დაარღვევენ საგანგებო მდგომარეობის პირობებს, 9 საათამდე შეიკრიბებიან და 6-მდე ტაძარში იქნებიან. ეს რა თქმა უნდა, მიუღებელია", — ამბობს ლელოს ლიდერი.

მამუკა ხაზარაძე მიიჩნევს, რომ თუ სახელმწიფო ვერ იღებს ამ პასუხისმგებლობას, არც ქუჩაში შეკრებილი სამი და ხუთი ადამიანის დაჯარიმების პრეტენზია უნდა ჰქონდეს. მისი თქმით, ქართული ოცნება კეკლუცობს და არჩევნებზე ფიქრობს.

"ესენი ეკეკლუცებიან მრევლს, ეკეკლუცებიან ეკლესიას, იმისთვის, რომ ფიქრობენ არჩევნებზე. აქ ახლა ჩვენ უნდა ვიფიქროთ ადამიანების ჯანმრთელობაზე, უკლებლივ ყველაზე, ჩვენი მამაოების, პატრიარქის პირველ რიგში და მეუფეების ჯანმრთელობაზე. ღმერთმა დაიფაროს, სამწუხარო ფაქტები მოდის სხვა ქვეყნების მართლმადიდებელი ეკლესიებიდან. მე არ მინდა მსგავსი სურათი ვიხილო ჩვენს ეკლესიაში", — ამბობს ის.

მამუკა ხაზარაძის თქმით, ვიღაცებს უნდათ წარმოაჩინონ, თითქოს "ვიღაც ან ეკლესიას ებრძვის, ან რელიგიას" და ასე არ არის. ლელოს ლიდერი აღნიშნავს, რომ რისკი საკმაოდ მაღალია და ეხება ყველას.

"პანდემია და ინფექცია არ არჩევს არავის წარმოშობის, რელიგიური თუ სოციალური მდგომარეობის მიხედვით. სწორედ ამას ემსახურება კარანტინი და საგანგებო მდგომარეობა", — აღნიშნავს ის.

On.ge-ს კითხვას, თავად დაესწრება თუ არა სააღდგომო ლიტურგიას, მამუკა ხაზარაძე უარყოფითად პასუხობს და აღნიშნავს, რომ არც ერთი აღდგომა არ გაუცდენია. მისივე აზრით, ეკლესიის კარები არ უნდა დაიხუროს და წირვა-ლოცვა ჩატარდეს, მაგრამ მრევლის გარეშე.

"ეს არის ჩვენი ხვედრი და გამოწვევა, უნდა გადავიტანოთ. ჩვენ უნდა ვიფიქროთ მოხუც ადამიანებზე. ღმერთმა დაგვიფაროს და ეს რომ გავრცელდეს და პიკს მიარტყას, ჩვენი ქვეყანა ამას ვერ გაუძლებს, ვერც მორალურად და ვერც ფიზიკურად. ღმერთი არ უნდა გამოვცადოთ, ეს ბიბლიაშიც ნათქვამია", — აღნიშნავს ის.

მთავრობის გადაწყვეტილებით, საყოველთაო კარანტინის პირობებში, სამზე მეტი პირის თავშეყრა იკრძალება, გარდა სასურსათო მაღაზიებისა და აფთიაქებისა. მიუხედავად ამისა, ეკლესიებსა და ტაძრებში მსახურება გრძელდება და მრევლი, ძირითადად, სოციალური დისტანციის დაცვით წირვებს ჩვეულ რეჟიმში ესწრება.

პირველ აპრილს პატრიარქმა ილია მეორემ გაავრცელა მიმართვა, რომლის თანახმადაც, ტაძრის კარის დახურვა შეუძლებელია და ღია იქნება მათთვის, ვინც ეკლესიაში მისვლას მოისურვებს, შესაბამისად ჩატარდება სააღდგომო ლიტურგიაც. ტაძრებში წირვა-ლოცვების ჩატარებისთვის კი სასულიერო პირებს სამი რეკომენდაცია სმს-ით გაუგზავნეს.

12 აპრილს ცნობილი გახდა, რომ მართლმადიდებელ ეკლესიებში სააღდგომო ღვთისმსახურებას კომენდანტის საათის დროს ჩაატარებენ.

სამთავრობო გუნდი ისევ აცხადებს, რომ საკარანტინო შეზღუდვები ეხება ყველას და სააღდგომო ლიტურგიაზე შეკრებაც საკომენდანტო საათის დარღვევა იქნება, თუმცა 3-ზე მეტი ადამიანის შეკრებისთვის ეკლესიაში არავინ დაუჯარიმებიათ.

მინისტრთა კაბინეტის წევრები უარს ამბობენ ეკლესიაში მისვლაზე და მოქალაქეებსაც სახლში დარჩენისკენ მოუწოდებენ.

ბოლო მონაცემებით, საქართველოში კორონავირუსით ინფიცირების 272 შემთხვევაა დადასტურებული, მათ შორის გამოჯანმრთელებულია 68 ადამიანი, ხოლო გარდაცვლილია 3. ჯანდაცვის სფეროს წარმომადგენლები ვირუსის გავრცელების პიკს აპრილის ბოლოს, სწორედ საეკლესიო დღესასწაულების დროს ელოდებიან.