დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

ახალი კორონავირუსი საქართველოს ბანკის სხვა თანამშრომლებსაც დაუდასტურდათ. ინფორმაციას ამის შესახებ სებ-ი თავად ავრცელებს.

ეროვნულ ბანკში ამბობენ, რომ ტესტირება ჩაუტარდა ყველა იმ ადამიანს, რომელიც კონტაქტში იყო გასულ კვირას ინფიცირებულ შვიდ თანამშრომელთან. შედეგად, კორონავირუსი 9 ადამიანს დაუდასტურდა, ნაწილზე კი პასუხი უარყოფითია. ამ დროის მონაცემებით, ინფიცირებულია სებ-ის 16 თანამშრომელი.

ეს არ არის კორონავირუსის ახალი შემთხვევები საქართველოში, ისინი უკვე გამოვლენილ 188 ადამიანს შორის არიან.

"ამჟამად კოვიდ-19 ვირუსის მქონე თანამშრომელები შესაბამის სტაციონარში ექიმების მეთვალყურეობის ქვეშ გადიან მკურნალობას. მათი მდგომარეობა ამ ეტაპზე დამაკმაყოფილებელია. ის თანამშრომლები, ვისაც შემხებლობა ჰქონდათ დაინფიცირებულ კოლეგებთან, სრულ იზოლაციაში იმყოფებიან და მათზე დაკვირვება მიმდინარეობს. სასიხარულოა, რომ რამდენიმე მათგანს ტესტირების შედეგად კორონავირუსი არ დაუდასტურდა. კვლავ გრძელდება ეპიდემიოლოგიური კვლევა ინფიცირებული თანამშრომლების ყველა შესაძლო კონტაქტის დადგენა-გამოვლენის მიზნით", — აღნიშნავენ სებ-ში.

ეროვნული ბანკის ინფორმაციით, ამჟამად თანამშრომელთა 90% დისტანციურად მუშაობს, ყველა მათ შენობაში რეგულარულად ტარდება სადეზინფექციო და დასუფთავების სამუშაოები და ბანკის ოფისები ოპერირების საგანგებო რეჟიმზეა გადასული.

"მიუხედავად ამისა, ეროვნული ბანკი სრულყოფილად და შეუფერხებლად ასრულებს თავის ამოცანებს: ბანკებს მიეწოდებათ სათანადო რაოდენობის ფულის ნიშნები, საფინანსო სექტორი აგრძელებს გამართულ ფუნქციონირებას", — აღნიშნულია სებ-ის მიერ გავრცელებულ განცხადებაში.

მათივე ინფორმაციით, ბოლო წლებში აქტიურად მუშავდებოდა საერთაშორისო სტანდარტების შესაბამისი ბიზნესის (საქმიანობის) უწყვეტობის გეგმა. ასევე, შემუშავდა სისტემა პოტენციური რისკების შეფასებისა და მოვლენების სხვადასხვა სცენარისთვის, რათა გართულებების პირობებშიც კი, ბანკს საქმიანობის შეუფერხებლად გასაგრძელებლად სრული ოპერაციული მზაობა ჰქონდეს.

6 აპრილის მონაცემებით, საქართველოში კორონავირუსით ინფიცირების 188 შემთხვევაა დაფიქსირებული. მათგან ორი პაციენტი გარდაიცვალა, 36 კი უკვე გამოჯანმრთელდა. ამ დრომდე კარანტინის რეჟიმში რჩება 5 056 ადამიანი, სტაციონარში მეთვალყურეობის ქვეშ — 386.

კორონავირუსის გავრცელების პრევენციისთვის საქართველოში 21 მარტს საგანგებო რეჟიმი გამოცხადდა და დამატებითი შეზღუდვები დაწესდა. აღნიშნული ზომები 31 მარტის შემდეგ გამკაცრდა, როდესაც პრემიერ-მინისტრმა გიორგი გახარიამ "ფაქტობრივი კარანტინი" გამოაცხადა. ამოქმედდა ე.წ. კომენდანტის საათი და სამზე მეტი ადამიანის შეკრება აიკრძალა.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: