უკვე მეორე დღეა მთელი მსოფლიო დონალდ ტრამპის გამარჯვებას განიხილავს. ჩვენ უკვე ვნახეთ, რა განცხადებები გააკეთეს ცნობილმა ადამიანებმა ამის შესახებ, ახლა ცნობილი ამერიკელი მწერლების ჯერია.

სტივენ კინგი, რომელიც მთელ მსოფლიოში და მათ შორის საქართველოშიც ერთ-ერთი ყველაზე გაყიდვადი ავტორია, ტვიტერის გვერდზე შემდეგ განცხადებას აკეთებს :

„უახლოეს მომავალში არანაირი წიგნის რეკომენდაციები, პოლიტიკა ან ძაღლის სახალისო ფოტოები. ვეთიშები ამ ყველაფერს.“ - წერს სტივენ კინგი.

მოკლე კომენტარით შემოიფარგლა ჯუდი ბლუმი, რომელმაც New Yorker-ის სტატია გააზიარა და ზედ წარწერა დაურთო :

„დღეს მეტს არაფერს დავპოსტავ. ეს არის ამერიკული ტრაგედია.“

ჰარი პოტერის მაგიური სამყაროს შემქმნელმა და საკულტო მწერალმა, ჯოანა როულინგმა, რომელიც არ არის ამერიკის მოქალაქე, ამერიკელებს რჩევა მისცა, თუ როგორ უნდა გააგრძელონ წინ სიარული.

„ჩვენ ყველანი ერთად ვართ. ჩვენ დავიცავთ დაუცველებს. ჩვენ ვიწვევთ ფანატიკოსებს. ჩვენ არ დავუშვებთ, რომ სიძულვილის ენა ნორმად იქცეს. ჩვენ ვმართავთ კურსს.“ - წერს როულინგი.

„ბედის ვარსკვლავის ბრალიას“ ავტორმა, Youtube-ერმა და თინეიჯერების ერთ-ერთმა საყვარელმა მწერალმა, ჯონ გრინმა მოვლენების შესაფასებლად ცნობილი ანდაზა გამოიყენა.

„რასაც დათესავ, იმას მოიმკი“ - წერს ჯონ გრინი.

თავისი აზრი გამოთქვა როქსანა გეიმაც, რომელმაც დაწერა, რომ ამერიკელებს მომავალში მეტი ყურადღება მართებთ.

„ჩვენ უნდა დავინახოთ ჩვენი ქვეყანა უფრო ფართოდ გახელილი თვალებით და არ გვაქვს უფლება, სიძულვილი და შიში ვერ შევამჩნიოთ მომავალში“ - წერს გეი.

თავისი აზრი გამოთქვა მარგარეტ ეტვუდმაც, რომელმაც სხვებთან შედარებით, მეტად ოპტიმისტური განცხადება გააკეთა.

„ძვირფასო ამერიკელებო, გრძელ ვადაში ყველაფერი კარგად იქნება. (რამდენად ხანგრძლივ? ამას ვნახავთ). არ დაგავიწყეთ, უარესი დაბრკოლებებიც გადაგილახავთ.“ - წერს ცნობილი კანადელი მწერალი.

დონალდ ტრამპის პრეზიდეტად არჩევას გამოეხმაურა "ყინულისა და ცეცხლის სიმღერის" ავტორი ჯორჯ მარტინიც. მწერალმა პირადი ბლოგით საზოგადოებას სინანულით შეახსენა ცნობილი სიტყვები თავისივე წიგნიდან - "ზამთარი მოდის!".

საპრეზიდენტო არჩევნების დასრულებიდან მოკლე დროში მარტინმა, რომელიც ჰილარი კლინტონს აქტიურად უჭერდა მხარს, ბლოგი გამოაქვეყნა სათაურით - President Pussygrabber, სადაც წერდა:

"ნამდვილად არ არსებობს სიტყვები, რითიც გადმოვცემ, თუ რას ვგრძნობ ამ დილით.

ამერიკა ამეტყველდა და ნამდვილად მეგონა, რომ ამაზე უკეთესები ვიყავით, თუმცა შევცდი. ტრამპი იყო ყველაზე ნაკლებად კვალიფიციური კანდიდატი, რომელსაც ოდესმე უბრძოლია წამყვანი პარტიიდან პრეზიდენტობისთვის. მოვა იანვარი და ის გახდება ამერიკის ისტორიაში ყველაზე ცუდი პრეზიდენტი და სახიფათოდ არასტაბილური მოთამაშე მსოფლიო არენაზე.

განადგურებულ დემოკრატებს კი, რომლებიც პალატსა და სენატში უმცირესობას წარმოადგენენ, ძალა არ ექნებათ, რომ მას ხელი შეუშალონ.

მომდევნო ოთხ წელიწადში ჩვენი პრობლემები ძალიან, ძალიან გაუარესდება.

ზამთარი მოდის, ხომ გეუბნებოდით." - წერს ჯორჯ მარტინი მწერალი.