მთელი დღის განმავლობაში მსოფლიოს ყურადღება ამერიკის შეერთებული შტატების საპრეზიდენტო არჩევნებისკენ იყო მიმართული. აი რა რეაქცია ჰქონდათ მსოფლიო ლიდერებს ტრამპის ტრიუმფზე:

რუსეთი

პრეზიდენტ ვლადიმერ პუტინის თქმით, ის მზადაა სრულად აღადგინოს ურთიერთობა აშშ-სთან ტრამპის გამარჯვების შემდგომ:

"ჩვენ ვისმენდით წინასაარჩევნო განცხადებებს რუსეთსა და ამერიკას შორის ურთიერთობების აღდგენის შესახებ. ეს არ არის მარტივი გზა, თუმცა მზად ვართ შევიტანოთ წვლილი და გავაკეთებთ ყველაფერს, რათა დავაბრუნოთ რუსეთ-ამერიკის ურთიერთობა განვითარების სტაბილურ გზაზე. ეს იქნება კარგი როგორც რუსი, ასევე ამერიკელი ხალხისთვის და ექნება პოზიტიური გავლენა ზოგად საერთაშორისო კლიმატზე."

რუსეთ-ამერიკის ურთიერთობა კიდევ უფრო დაიძაბა უკრაინისა და სირიის კონფლიქტების და აშშ-ის საპრეზიდენტო კამპანიის დროს რუსეთის შესაძლო კიბერ თავდასხმების გამო.

ჩინეთი

ჩინეთის პრეზიდენტმა, სი ძინ პინმა დონალდ ტრამპს გამარჯვება ტელეგრამით მიულოცა.

უფრო ადრე საგარეო საქმეთა მინისტრმა განაცხადა, რომ ჩინეთს ახალ მთავრობასთან მუშაობისა და ორმხრივი ურთიერთობების გაუმჯობესების იმედი ჰქონდა:

"აშშ-სა და ჩინეთის სავაჭრო ურთიერთობები ორივე ქვეყნისთვის თანაბრად სასარგებლოა. ვაპირებთ, რომ შტატების ახალ ადმინისტრაციასთან ერთობლივად ვიმუშავოთ და თანმიმდევრული, ჯანსაღი და სტაბილური ურთიერთობა ჩამოვაყალიბოთ, რომელიც სასარგებლო იქნება ჩვენი ხალხებისა და მსოფლიოსთვის."

ირანი

პრეზიდენტმა, ჰასან როჰანმა განაცხადა, რომ შედეგებს არანაირი გავლენა არ ექნება ირანის პოლიტიკაზე.

ავღანეთი

პრეზიდენტ აშრაფ ღანის თქმით, მისი ქვეყანა და აშშ "ტერორიზმის წინააღმდეგ ბრძოლაში სტრატეგიული პარტნიორები არიან."

"ავღანეთის მთავრობა იმედოვნებს, რომ ახლო კოოპერაცია ახალ პრეზიდენტთან კიდევ უფრო გააღრმავებს კავშირს ორ სახელმწიფოს შორის." - წერია საპრეზიდენტო სასახლის გავრცელებულ განცხადებაში.

გაერთიანებული სამეფო

მის მისალოც ტექსტში პრემიერმინისტრმა, ტერესა მეიმ ორ ქვეყანას შორის "განსაკუთრებულ ურთიერთობაზე" გაამახვილა ყურადღება:

"ჩვენ ვართ და დავრჩებით ძლიერ და ახლო პარტნიორებად ვაჭრობის, უსაფრთხოებისა და თავდაცვის კუთხით. მოუთმენლად ველი არჩეულ პრეზიდენტთან მუშაობას, რათა მომავალშიც უზრუნველვყოთ ჩვენი ერების უსაფრთხოება და განვითარება."

საფრანგეთი

პრეზიდენტმა, ფრანსუა ოლანდმა თქვა, რომ ბატონი ტრამპის გამარჯვება "გაურკვევლობის პერიოდს გააჩენს." მისივე თქმით, კიდევ უფრო საჭირო გახდა ევროპის ერთიანობა, მისი ღირებულებების პოპულარიზაციისა და საერთაშორისო გავლენისათვის.

გერმანია

"აშშ ძალიან ძველი და პატივსაცემი დემოკრატიაა" - განაცხადა კანცლერმა, ანგელა მერკელმა.

"გერმანელებს, გარდა ევროპის კავშირისა, უფრო ღრმა ურთიერთობა არავისთან გვაქვს, ვიდრე ამერიკის შეერთებულ შტატებთან."

ინდოეთი

პრემიერ მინისტრმა, ნარენდრა მოდიმ დატვიტა: "ვაპირებთ მჭიდროდ ვიმუშავოთ თქვენთან ერთად, რომ ინდოეთ-ამერიკის ურთიერთობა ახალ სიმაღლეებზე გადავიყვანოთ."

იაპონია

პრემიერმინისტრმა შინზო აბემ განაცხადა, რომ შეინარჩუნებს ახლო ურთიერთობას ამერიკასა და იაპონიას შორის:

"იაპონია და აშშ ურყევი მოკავშირეები არიან, რომლებსაც საერთო ღირებულებები აკავშირებთ, როგორიცაა თავისუფლება, დემოკრატია, ადამიანის ფუნდამენტური უფლებები და კანონის უზენაესობა."

თურქეთი

თურქეთის პრეზიდენტმა განაცხადა, რომ იმედოვნებს, ტრამპის გამარჯვება ახლო აღმოსავლეთს პოზიტიურ ნაბიჯებს და მსოფლიოს მეტ თავისუფლებას მოუტანს:

"იმედი მაქვს, რომ ამერიკელი ხალხის ეს არჩევანი მსოფლიოს ადამიანის ძირითადი უფლებებისა და თავისუფლებისკენ გადადგმულ სასარგებლო ნაბიჯებს მოუტანს."

პალესტინა

პრეზიდენტმა მაჰმუდ აბბამ ტრამპს გამარჯვება მიულოცა და იმედი გამოთქვა, რომ "მისი პრეზიდენტობის დროს მშვიდობა დამყარდება".

ისრაელი

ისრაელის პრემიერმინისტრმა ტრამპს "ისრაელის სახელმწიფოს ნამდვილი მეგობარი" უწოდა.

"ვაპირებ, რომ ვიმუშავო მასთან, რომ გავაუმჯობესოთ უსაფრთხოება, სტაბილურობა და მშვიდობა ჩვენს რეგიონში."

ევროკავშირი

ფედერიკა მოგერინიმ ტვიტერზე დაწერა, რომ ევროკავშირისა და აშშ-ის კავშირი უფრო ღრმაა, ვიდრე ნებისმიერი ცვლილება პოლიტიკაში:

"ჩვენ განვაგრძობთ ერთად მუშაობას ევროპის სიძლიერის ხელახლა აღმოჩენისთვის."

ფილიპინები

პრეზიდენტ როდრიგო დუტერტეს პრესსამსახურის ცნობით, პრეზიდენტი "აპირებს ითანამშრომლოს ახალ ადმინისტრაციასთან, რათა გააფართოვოს ფილიპინებისა და აშშ-ის ურთიერთობა, რომელიც დაფუძნებულია ურთიერთპატივისცემაზე, საერთო სარგებელზე, დემოკრატიული იდეალებისადმი საერთო ვალდებულებებზე და კანონის უზენაესობაზე."

საქართველო

ტრამპს გამარჯვება მიულოცა საქართველოს პრემიერმინისტრმა, გიორგი კვირიგაშვილმაც.

"მოწოდებული ვართ, განვაგრძოთ თანამშრომლობა ამერიკის შეერთებული შტატების ახალ ადმინისტრაციასთან მშვიდობის, უსაფრთხოების, განვითარებისა და თავისუფლების უზრუნველსაყოფად ჩვენს ქვეყნებში, რეგიონში და მის მიღმა".