პარლამენტის თავმჯდომარისა და ქართული ოცნების პოლიტსაბჭოს წევრის, არჩილ თალაკვაძის მტკიცებით, პარტიის თავმჯდომარე ბიძინა ივანიშვილი, ყოველღიურად "ყურადღებასა და ძალისხმევას ხარჯავს", რომ ქვეყანამ კორონავირუსთან ბრძოლისას ნაკლები ზიანი მიიღოს. მისი თქმით, ივანიშვილი ყოველდღიურ კავშირზეა თანამდებობის პირებთან, ვინც კორონავირუსის პრევენციის ღონისძიებებზე მუშაობენ.

თალაკვაძე ივანიშვილს გამოესარჩლა და უპასუხა მათ, ვინც ქართული ოცნების თავმჯდომარეს აკრიტიკებს იმის გამო, რომ კორონავირუსის საკითხზე არანაირი განცხადება არ გაუვრცელებია.

"ახლა არ არის ამის დრო, მაგრამ აუცილებლად პასუხი უნდა გაეცეთ იმ ადამიანებსაც, ვინც ასეთ სასოწარკვეთილ განცხადებებს აკეთებენ: სად არის ახლა ბიძინა ივანიშვილი. ეს ხალხი არიან პოლიტიკური ფარისევლები და ეს ზუსტად ის ხალხია, რომელიც რამდენიმე წლის წინ და ამ წლების განმავლობაში ამბოდნენ, რატომ არის ივანიშვილი ჩართული პოლიტიკაში და საუბრობდნენ ე.წ. არაფორმალურ მმართველობაზე", — განაცხადა თალაკვაძემ იმედის ეთერში და დაამატა, რომ ივანიშვილი ლეგიტიმურად მონაწილეობდა პოლიტიკურ პროცესებში.

მას შემდეგ, რაც საქართველოში კორონავირუსი გავრცელდა, საზოგადოების ნაწილი და ოპოზოცია აკრიტიკებს ბიძინა ივანიშვილს დუმილის გამო. ამ დრომდე, მხოლოდ მის მფლობელობაში არსებული ქართუ ბანკი გამოეხმაურა მიმდინარე მოვლენებს, სადაც განაცხადეს, რომ "საჭიროების შემთხვევაში" მთავრობას დაეხმარებოდა.

კარანტინი 2 რაიონში და საგანგებო მდგომარეობა ქვეყანაში: ახალი შეზღუდვები და რეკომენდაციები

ბოლო მონაცემებით, საქართველოში კორონავირუსით ინფიცირების 54 შემთხვევაა დაფიქსირებული, აქედან გამოჯანმრთელდა 8 პაციენტი. კარანტინში მოთავსებულია 3 320 ადამიანი, სტაციონარში მეთვალყურეობის ქვეშ კი 235.

კორონავირუსის გავრცელების გამო ქვეყანაში საგანგებო მდგომარეობაა გამოცხადებული და სხვადასხვა აკრძალვებია დაწესებული, მათ შორის აკრძალულია 10-ზე მეტი ადამიანის შეკრება.

მას შემდეგ, რაც გაირკვა, რომ მარნეულში ინფიცირებულ პირს, ათეულობით ადამიანთან ჰქონდა კონტაქტი, საკოორდინაციო უწყებათაშორისი საბჭოს გადაწყვეტილებით, მარნეულისა და ბოლნისის რაიონებში მკაცრი საკარანტინო რეჟიმი გამოცხადდა. ჩაიკეტა ორივე რაიონის შესასვლელი, რომელსაც სამხედროები და შსს-ს თანამშრომლები აკონტროლებენ. ასევე, გაიშალა საველე ჰოსპიტლები.

ჯანდაცვის სამინისტროს დაევალა, მარნეულსა და ბოლნისში დაიწყოს ტესტირების სპეციალური პროგრამა. ჯანდაცვის მინისტრის თქმით, სწრაფი ტესტები ქვეყანაში ხვალიდან შემოვა.

გარდა ამისა, მთავრობის გადაწყვეტილებით, საქალაქთაშორისო გადაადგილება აიკრძალა ყველა სახის ტრანსპორტით, გარდა პირადი ავტომობილებისა. თბილისის მერიის გადაწყვეტილებით კი შეზღუდვები დაწესდა ტაქსებზე. კერძოდ, მხოლოდ 2 მგზავრის გადაყვანა შეიძლება უკანა სავარძლებზე და ფანჯრები უნდა იყოს ღია.

დღეს, 23 მარტს ცნობილი გახდა, რომ მთავრობის განკარგულებით, საქართველოს ავიახაზები 2 კვირის განმავლობაში მსოფლიოს 6 ქალაქიდან ჩამოიყვანს მგზავრებს. მთავრობის მოთხოვნით, ბილეთის ფასი არ უნდა აღემატებოდეს €199-ს.

საგანგებო მდგომარეობის გამოცხადებამდეც, მთავრობას კორონავირუსის პრევენციისთვის დაწესებული ჰქონდა არაერთი შეზღუდვა. კერძოდ:

გარდა ამისა, როგორც კერძო, ისე საჯარო სექტორს მიცემული აქვს რეკომენდაცია დისტანციურ მუშაობაზე. 70 წელზე ზევით მოხუცებს კი თვითიზოლაცია ურჩიეს.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: