2 წლის წინ, როდესაც კრეიგ უილიამსმა ლოს-ანჯელესის ცენტრში თავისი საწარმოო სტუდია გახსნა, ფიქრობდა, რომ ავეჯის გადაკეთებულ საწყობს დროდადრო მუსიკალური ვიდეოების გადასაღებად გააქირავებდა, რათა თავისი ახალი კინობიზნესი ერჩინა.

უილიამსი გაოგნებული დარჩა ფენომენით, რომელმაც სწრაფად მოიცვა მისი გადასაღები სივრცე. ეს იყო მიკროდრამები — ვერტიკალურად გადაღებული სერიალები, რომლებიც ტელეფონით საყურებელ ორწუთიან ეპიზოდებადაა დაყოფილი.

ახლა უილიამსი 3 მედია-საწარმოს მართავს, რომლებსაც სახელი გადაარქვა და Vertical World Studios უწოდა. ეს სივრცეები სრულად ვერტიკალური მოკლემეტრაჟიანი ფილმების სამყაროს ემსახურება. სტუდიები სავსეა დეკორაციებით — საავადმყოფოს პალატა, პოლიციის განყოფილება, სასამართლო დარბაზი, ღამის კლუბი — რომლებიც უილიამსმა მსხვილი ჰოლივუდური სტუდიებისგან შეიძინა.

ეს ყველაფერი გასაკვირი არცაა — ჰოლივუდი მცირდება. სტუდიების მოსალოდნელი შერწყმები ფილმებისა და შოუების წარმოებას კიდევ უფრო შეამცირებს. სტრიმინგ კომპანიებს Youtube ამარცხებს, მსახიობებს კი ხელოვნური ინტელექტისა და მისი მომავლის ეშინიათ.

შესაძლოა, მიკროდრამები ერთადერთი რამ იყოს, რაც დღეს ჰოლივუდში იზრდება.

კვლევითი კომპანია Omdia ვარაუდობს, რომ მიკროდრამების ფორმატი აშშ-ს წელს $1.5 მილიარდ შემოსავალს მოუტანს, მომავალ წელს კი — თითქმის 2 მილიარდს. ამ დროს, აშშ-ის უზარმაზარი სატელევიზიო ბიზნესი უფრო და უფრო მცირდება.

მიკროდრამების ზრდა ჩინეთის მზარდი რბილი ძალის ნიშანიცაა. ეს ფორმატი სწორედ ჩინეთში შეიქმნა, ხოლო მისმა სწრაფმა აღმავლობამ ჩინური ინვესტიციებით ზურგგამაგრებულ აპლიკაციებს, ReelShort-სა და GoodShort-ს, ჰოლივუდში ფეხის მოკიდების საშუალება მისცა.

მიკროდრამების წარმატების საიდუმლო იმაში მდგომარეობს, რომ ისინი საუკუნოვან ფორმულას იყენებენ — ეპიზოდს ყველაზე დაძაბულ და ინტრიგით სავსე მომენტში წყვეტენ. ეპიზოდების ხანგრძლივობა 45 წამიდან 2 წუთამდე მერყეობს, რაც სიღრმისეული, შინაარსიანი სიუჟეტის შესაქმნელად საკმარისი დრო არაა.

Omdia-ს მონაცემებით, გასულ წელს აშშ-ში მიკროდრამებს ყოველთვიურად დაახლოებით 66 მილიონი აქტიური მომხმარებელი უყურებდა, რაც ბევრად მეტია 2024 წლის მაჩვენებელზე (26 მილიონი). დრამების ძირითად აუდიტორიას 25-დან 55 წლამდე ასაკის ქალები შეადგენენ.

კომპანიის ხელმძღვანელების თქმით, თითოეული მიკროდრამატული სერიალი ჩვეულებრივ 50-დან 75 ეპიზოდამდე გრძელდება. მისი წარმოება დაახლოებით სამ თვეს მოითხოვს და $100 000-300 000 ჯდება. შედარებისთვის, ტრადიციული ნახევარსაათიანი სიტკომის მხოლოდ ერთი ეპიზოდის ღირებულება $2-4 მილიონამდე მერყეობს.

სერიალების სახელწოდებებს შორის შეხვდებით: "ცუდი ბიჭს მე ვუნდივარ", "მაფიის ცდუნება" და "ჩემი სექსუალური ეშმაკი".

როგორც წესი, მიკროდრამების პირველი რამდენიმე ეპიზოდი უფასოა, რის შემდეგაც ეპიზოდის სანახავად ფულის გადახდა ან რეკლამების ყურება და საათობით ლოდინი გიწევს.

TikTok, Instagram Reels, Facebook და YouTube Shorts მიკროდრამების ტრეილერის როლს ასრულებენ და მომხმარებლებს დრამების აპლიკაციებისკენ ამისამართებენ.

ხოლო მანამ, სანამ ჰოლივუდის ფართო საზოგადოება ხელოვნური ინტელექტის დადებით და უარყოფით მხარეებზე მსჯელობს, მიკროდრამებმა ეს ტექნოლოგიაც აქტიურად აითვისეს. კაცების აუდიტორიის მიზიდვის მიზნით, პლატფორმა Ironblood-მა დაიწყო ექშენზე ორიენტირებული მიკროდრამების მასობრივი წარმოება, რომლებიც ხელოვნური ინტელექტის წყალობით კიდევ უფრო სწრაფად და იაფად იქმნება. AI-ს დახმარებით მიკროდრამის დასრულება 3-4 კვირაშია შესაძლებელი, ხოლო მისი ბიუჯეტი $60 000-ს ან ნაკლებს შეადგენს.

AI-შოუების სცენარს ადამიანები წერენ, ხოლო რეალურ მსახიობებს იმისთვის ქირაობენ, რომ ხელოვნურ ინტელექტს ადამიანური ემოციების უკეთ გამოხატვა ასწავლონ.

"ნებისმიერი ცვლილების შეტანა ორ წუთში შემიძლია. თუ რეჟისორებს სურთ, რომ პერსონაჟმა გაიღიმოს, უბრალოდ შევდივარ მითითებების ველში, ვწერ: 'გააღიმე ეს პერსონაჟი' — და სულ ესაა", — ამბობს Ironblood-ის პროდიუსერი და მემონტაჟე ელიზაბეთ კნობელი.