უკრაინის პრეზიდენტმა ვოლოდიმირ ზელენსკიმ ხელი მოაწერა ბრძანებას იმ რუსი ფიზიკური და იურიდიული პირების წინააღმდეგ სანქციების დაწესების შესახებ, რომლებიც ანიმაციური სერიალის — "მაშა და დათვის" შექმნაში მონაწილეობენ. უკრაინული მხარის განცხადებით, აღნიშნული მულტფილმი რუსულ ნარატივებს ავრცელებს. ინფორმაციას უკრაინული მედია ავრცელებს.

"სანქციები დაუწესდა ხუთ რუს ფიზიკურ პირსა და ოთხ ორგანიზაციას, რომლებიც ჩართულნი არიან ანიმაციური სერიალის "მაშა და დათვის" შექმნასა და გავრცელებაში. აღნიშნული სერიალი, საბავშვო კონტენტის საფარქვეშ, პრორუსულ ნარატივებს ავრცელებს და საფრთხეს უქმნის უკრაინის ეროვნულ უსაფრთხოებას", — წერს უკრაინია პრეზიდენტის ოფისი.

სანქციები შეეხო:

  • სტუდია Animaccord-ს, რომელიც ანიმაციური სერიალის უკან დგას;

  • სტუდიის დამფუძნებელსა და გენერალურ დირექტორს;

  • სცენარისტს, რეჟისორსა და პროდიუსერს;

  • სერიალის თანაშემქმნელს, რომელიც თანხებს რუსეთის ბიუჯეტში რიცხავს;

ცნობისთვის, 2025 წლის აგვისტოს "მაშა და დათვის" არხი უკრაინელ მომხმარებლებს შორის YouTube-ის ყველაზე პოპულარული საბავშვო არხების რეიტინგის სათავეში მოექცა. 2025 წლის ოქტომბერში უკრაინის ეროვნულმა პოლიციამ დაადასტურა მულტფილმის კავშირი რუსეთთან და მისი სანქცირებისკენ მოუწოდა.