ქართულმა სასამართლომ ექსპრემიერ, ბიზნესმენ ნიკა გილაურს და მის კომპანიებს $12 მლნ-ზე მეტის გადახდა დააკისრა, სხვა კომპანიებში წილები დაუყადაღა და საქართველოში ერთადერთი სახლი აუქციონზე გაუყიდა. ამის შესახებ "რადიო თავისუფლების" ჟურნალისტური გამოძიებიდან ხდება ცნობილი.

ამას წინ უძღოდა, 2024 წელს საჯარო გამოსვლები, სადაც გილაური ღიად აკრიტიკებდა ოცნების ხელისუფლებას, შემდეგ კი საქველმოქმედო ფონდი Prosperity Georgia დააარსა პროევროპულ აქციებში დაშავებული მოქალაქეების დასახმარებლად, მაგრამ ფონდი 2025 წლის მარტში დააყადაღეს. ამის შემდეგ კი მის წინააღმდეგ 2021 წელს დაწყებული და 4 წლის განმავლობაში გაწელილი სასამართლო პროცესი დაჩქარდა და 2 თვეში დასრულდა. განაჩენი 2025 წლის 12 თებერვალს გამოცხადდა — თბილისის საქალაქო სასამართლოს მოსამართლე ლიანა კაჟაშვილმა გილაურის მხარე გაამტყუნა.

რას ედავებოდნენ გილაურს და მის კომპანიებს?

გილაურს და მის კომპანიებს, ყოფილი ბიზნესპარტნიორის სასარგებლოდ, მცირე ჰესების მშენებლობის გამო წარმოქმნილ დავაში 12 მილიონზე მეტი დოლარის გადახდა დაეკისრათ.

გილაურის კომპანიის წინააღმდეგ სასამართლოში საჩივარი შეიტანა შპს "ბლექსი გრუპმა". ჰესების მშენებლობის საქმეზე მოსარჩელე ამტკიცებდა, რომ გილაურის კომპანიებმა შესრულებული სამუშაოს საფასური სრულად არ გადაუხადა.

"რადიო თავისუფლება" წერს, რომ "ამ სასამართლო გადაწყვეტილებების უცხოელი და ქართველი იურისტების შეფასებებში დაუფარავი გაოგნება ჩანს იმით, თუ რამდენად დაუსაბუთებელია გადაწყვეტილება".

ვინ იყიდა 3 998 320 ლარად გილაურის სახლი წავკისში?

გილაურის სახლი წავკისში დაახლოებით ერთი თვის წინ ონლაინ აუქციონზე 3 998 320 ლარად გაიყიდა. "რადიო თავისუფლების" ცნობით, გილაურის სახლი აუქციონზე მისი ბიზნესმენი ძმის, ირაკლი გილაურის ყოფილმა ბიზნესპარტნიორმა, ვანო სტურუამ იყიდა, რომელიც თავადაც მსხვილი ბიზნესმენია.

ვინ არის ნიკა გილაური?

შეგახსენებთ, რომ ნიკა გილაური 29 წლის იყო, როდესაც ენერგეტიკის მინისტრი გახდა (2004-2007 წ.წ.), 32 წლის ფინანსთა მინისტრი იყო (2007-2009 წ.წ.), 35 წლის კი უკვე პრემიერმინისტრი (2009-2012 წ.წ.). მან პოსტი პოსტი 2012 წლის საპარლამენტო არჩევნებამდე სამი თვით ადრე დატოვა და ბიზნესში წავიდა.

2024 წლის საპარლამენტო არჩევნებამდე გავრცელდა ინფორმაცია, რომ ნიკა გილაურმა რამდენიმე მილიონი ლარით დააფინანსა გვარამია, მელია, ჯაფარიძე, ხოშტარიას მსხვილი ოპოზიციური გაერთიანება კოალიცია ცვლილებებისთვის. ოფიციალური წყაროებით, კოალიცია 5,6 მილიონი ლარით შემოწირულებით ქართული ოცნების შემდეგ მეორე ადგილზე გავიდა.

სრულად ჟურნალისტური გამოძიება წაიკითხეთ აქ.