საგარეო საქმეთა სამინისტროს ინფორმაციით, გაეროს უშიშროების საბჭომ დახურულ სხდომაზე, რუსეთ-საქართველოს ომის მე-18 წლისთავთან დაკავშირებით, ოკუპირებულ ტერიტორიებზე არსებული ვითარება და კონფლიქტის საკითხი განიხილა. სხდომის დასრულების შემდეგ საბჭოს წევრმა და მომავალმა წევრმა ქვეყნებმა ერთობლივი მხარდამჭერი განცხადება გაავრცელეს.

სხდომის დასრულების შემდეგ მედიასთან გაერთიანებული სამეფოს, საფრანგეთის, ლატვიის, დანიის, საბერძნეთის, ავსტრიისა და პორტუგალიის წარმომადგენლები წარდგნენ. პარტნიორმა ქვეყნებმა კიდევ ერთხელ დააფიქსირეს საქართველოს სუვერენიტეტისადმი მტკიცე მხარდაჭერა და რუსეთის აგრესიული პოლიტიკა დაგმეს.

"2026 წლის 20 აგვისტოს, გაეროს უშიშროების საბჭომ დახურულ სხდომაზე, რუსეთ-საქართველოს ომის მე-18 წლისთავთან დაკავშირებით, რუსეთის მიერ ოკუპირებულ საქართველოს ტერიტორიებზე არსებული ვითარება და რუსეთ-საქართველოს კონფლიქტის საკითხი განიხილა.

ხდომის ფარგლებში, გაეროს გენერალური მდივნის თანაშემწემ, ახლო აღმოსავლეთის, ევროპის, ამერიკის, აზიისა და ოკეანეთის საკითხებში, მოჰამედ ხალედ ხიარიმ გააკეთა მოხსენება და საბჭოს წევრებს ადგილზე არსებული ვითარებისა და ჟენევის საერთაშორისო მოლაპარაკებების პროცესის შესახებ განახლებული ინფორმაცია მიაწოდა.

სხდომის დასრულების შემდეგ, მედიასთან ერთობლივი განცხადებით წარდგნენ უშიშროების საბჭოს წევრი ქვეყნების — გაერთიანებული სამეფოს, საფრანგეთის, ლატვიის, დანიისა და საბერძნეთის, ასევე საბჭოს მომავალი წევრი ქვეყნების — ავსტრიისა და პორტუგალიის წარმომადგენლები.

ზემოხსენებული ქვეყნების წარმომადგენლებმა განცხადებაში აღნიშნეს, რომ 18 წელი გავიდა რუსეთის მიერ საქართველოს ტერიტორიების, აფხაზეთისა და ცხინვალის რეგიონების, სრულმასშტაბიანი სამხედრო აგრესიიდან და შემდგომი უკანონო ოკუპაციიდან. 2008 წლის აგვისტოში რუსეთის მიერ საქართველოში შეჭრამ აჩვენა რუსეთის უფრო აგრესიული პოლიტიკის დასაწყისი მეზობლების მიმართ. რუსეთი აგრძელებს ამ გზას უკრაინის წინააღმდეგ თავისი არაპროვოცირებული და გაუმართლებელი აგრესიით და მეზობელი ქვეყნების წინააღმდეგ განხორციელებული უპასუხისმგებლო და სახიფათო ქმედებებით", — წერია განცხადებაში.

გაერო-ს უშიშროების საბჭოს წევრებმა, საქართველოს საკითხზე გამართული სხდომის (AoB) შემდეგ, ერთობლივ განცხადება გაავრცელეს, სადაც მოუწოდებენ რუსეთს, სრულად შეასრულოს 2008 წლის ცეცხლის შეწყვეტის შეთანხმება და დაუყოვნებლივ გაიყვანოს თავისი ძალები საქართველოს ტერიტორიიდან. განცხადებაში ხაზგასმულია, რომ "რუსეთმა უნდა გააუქმოს საქართველოს ორი რეგიონის ე.წ. დამოუკიდებლობის აღიარება".

წერილის თანაავტორები არიან: დანია, საფრანგეთი, საბერძნეთი, გაერთიანებული სამეფო და ლატვია, ასევე უშიშროების საბჭოს მომავალი წევრები — ავსტრია და პორტუგალია.

განცხადება სრულად წაიკითხეთ აქ.