ამ მომენტისთვის არსებული მონაცემების მიხედვით, ჰილარი კლინტონი დააგროვებდა გამარჯვებისთვის საჭირო ხმებს, თუ ე.წ. მესამე პარტიების კანდიდატების მიერ მიღებული ხმების ნახევარი მაინც, მისკენ იქნებოდა.

ასეთ შემთხვევაში, დემოკრატიული პარტიის კანდიდატი იგებდა ვისკონსინის, პენსილვანიის, მიჩიგანის და ფლორიდის შტატებს, რაც ჯამში კოლეგიის 75 ხმას შეადგენს. ამ განაწილებით, ჰილარი 304 ხმით აშშ-ის პრეზიდენტი გახდებოდა.

მესამე პარტიების კანდიდატების მხარდაჭერა წლევანდელ და 2012 წლის არჩევნებზე

მესამე პარტიების კანდიდატების მხარდაჭერა წლევანდელ და 2012 წლის არჩევნებზე

მესამე პარტიების კანდიდატები ამ შტატებში არ გამოირჩეოდნენ განსაკუთრებული პოპულარობით. წელს, 2012 წლის არჩევნებთან შედარებით, მათ მიერ მიღებული ხმების ჯამური რაოდენობა გაორმაგებული ან გასამმაგებულია. სავარაუდოდ, მომატებული მხარდაჭერის მიზეზი, მთავარი პარტიების კანდიდატებით უკმაყოფილო ამომრჩეველია, რომელთაც მესამე პარტიებს პროტესტის ნიშნად მისცეს ხმა.

ჰილარი კლინტონისთვის ფლორიდაში გამარჯვება კრიტიკულად მნიშვნელოვანი იყო, რადგან ეს დონალდ ტრამპის უპირობო მარცხს ნიშნავდა. მწვანეთა პარტიის საპრეზიდენტო კანდიდატის, ჯილ სტეინისა და ლიბერტარიანული პარტიის კანდიდატის, გარი ჯონსონის, მომხრეებს რომ მისთვის მხარი დაეჭირათ, დემოკრატების კანდიდატი ამ შტატს და საპრეზიდენტო არჩევნებს იგებდა.

საბოლოო შედეგებით, მესამე პარტიების წარმომადგენლებმა ფლორიდაში ჯამში 3% მიიღეს. ამ შტატში ტრამპმა კლინტონს 1%-ით მოუგო.

უშანსო კანდიდატებს ჯამში 3 პროცენტი აქვთ ჩრდილოეთ კაროლინაშიც.

2012 წელს, როდესაც წინასწარი შედეგებით ბარაკ ობამა არჩევნებში მარცხდებოდა, მან ფლორიდაში 0,9%-ით მოიგო, რამაც არჩევნების შედეგი დემოკრატების სასარგებლოდ გადაწყვიტა.