დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05

ინფექციური საავადმყოფოს დირექტორის, მარინა ეზუგბაიას თქმით, დღეს, 14 მარტს საქართველოში კორონავირუსით დაინფიცირებული ხუთივე პაციენტი თვითიზოლაციაში იმყოფებოდა.

"მათი ზოგადი მდგომარეობა არ არის მძიმე. მხოლოდ ორ პაციენტთანაა ტემპერატურა 37.2, დანარჩენ პაციენტებთან სიმპტომები მინიმალურადაა გამოვლენილი. ხუთივე პირი იმყოფებოდა თვითიზოლაციაში, კონტაქტში იყვნენ 4 წყაროდან ერთ-ერთთან, ამიტომ იმყოფებოდნენ დაკვირვების ქვეშ", — განმარტა მარინა ეზუგბაიამ.

ექიმის ინფორმაციით, ამ დროისთვის თბილისის ინფექციურ საავადმყოფოში 27 პაციენტი წევს, მათგან 4 14-წლამდე ასაკისაა. დღეს ტესტირებისთვის 22 ახალი ნიმუში გაგზავნეს ლუგარის ლაბორატორიაში და პასუხები ეტაპობრივად გახდება ცნობილი.

დღეს, 14 მარტს საქართველოში კორონავირუსით ინფიცირების კიდევ 5 შემთხვევა დადასტურდა და ინფიცირებულების რაოდენობა 30-მდე გაიზარდა. ამირან გამყრელიძის თქმით, ქვეყანაში მესამეული, ანუ შიდა გადაცემა დაფიქსირდა. მისივე თქმით, ახალ ხუთ პაციენტს შეხება იტალიასთან ჰქონდა.

14 მარტს კორონავირუსი დაუდასტურდათ ათენში და მადრიდში მცხოვრებ საქართველოს მოქალაქეებსაც. ისინი ექიმების დაკვირვების ქვეშ იმყოფებიან.

პანდემია და რეკომენდაციები

მას შემდეგ, რაც ჯანდაცვის მსოფლიო ორგანიზაციამ COVID-19, იგივე კორონავირუსი, საერთაშორისო პანდემიად გამოაცხადა, საქართველოს მთავრობა მუშაობის საგანგებო რეჟიმზე გადავიდა და ახალი შეზღუდვები და რეკომენდაციები გაავრცელა.

საქართველოში კორონავირუსით ინფიცირების 30 შემთხვევაა დადასტურებული: პირველი 26 თებერვალს დაფიქსირდა, მეორე დაავადებათა კონტროლის ცენტრმა 28 თებერვალს დაადასტურა, მესამე — 29 თებერვალს, მეოთხე — 5 მარტს დილით, დანარჩენი 5 კი ამავე დღეს საღამოს, 7 მარტს კორონავირუსით ინფიცირების კიდევ 4 შემთხვევა დადასტურდა, 9 მარტს კორონავირუსი 2 პაციენტს დაუდასტურდა, 10 მარტს კი კორონავირუსის კიდევ 8 შემთხვევა დადასტურდა, კიდევ 1 შემთხვევა კი — 11 მარტს, 25-ე შემთხვევა 12 მარტს დადასტურდა.

ასევე, 4 მარტს კორონავირუსი დაუდგინდა იტალიაში მცხოვრებ საქართველოს მოქალაქეს.

წაიკითხეთ NCDC-სა და WHO-ს რეკომენდაციები კორონავირუსის პრევენციის შესახებ:

ამავე თემაზე: