თბილისის მერის, კახი კალაძის თქმით, პოლიეთილენის პარკების გამოყენებაზე მერიამ 350 ობიექტი შეამოწმა და მათგან 48-ს დარღვევა ჰქონდა. ამის შესახებ მერმა თბილისის მთავრობის სხდომაზე ისაუბრა. კალაძემ აღნიშნა, რომ პირველ ეტაპზე მეწარმეებს გაფრთხილება მისცეს და გაფრთხილების ვადების ამოწურვის შემდეგ შეამოწმეს.

"ბოლო დღეების განმავლობაში, მას შემდეგ, რაც გაფრთხილებით გათვალისწინებული ვადა ამოიწურა თბილისის მუნიციპალურმა ინსპექციამ 350 ობიექტი შეამოწმა, გამოიწერა სამართალდარღვევის 48 ოქმი. დაჯარიმდნენ მეწარმეები, რომლებმაც გაფრთხილებულ ვადაში არ მოახდინეს რეაგირება", — თქვა კახი კალაძემ.

მერმა მოუწოდა მეწარმეებს, რომ სანამ შეამოწმებენ და დააჯარიმებენ, დროულად ჰქონდეთ რეაგირება და დაიცვან კანონით გათვალისწინებული ნორმები.

2018 წლის პირველი ოქტომბრიდან საქართველოში 15 მიკრონზე ნაკლები სისქის პლასტიკის პარკების წარმოება, იმპორტი და რეალიზაცია აიკრძალა. 2019 წლის 1 აპრილიდან კი აკრძალვა ყველა ტიპისა და სისქის პლასტიკის პარკებზე გავრცელდა.

ადმინისტრაციული სამართალდარღვევათა კოდექსის მიხედვით, ტექნიკური რეგლამენტის დარღვევის გამო მეწარმე სუბიექტი 500 ლარითა და შესაბამისი პროდუქტის კონფისკაციით დაჯარიმდება, განმეორების შემთხვევაში კი 1000 ლარით, ამ შემთხვევაშიც, შესაბამისი პროდუქტის კონფისკაციით.