დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05

საგარეო საქმეთა სამინსიტროს ინფორმაციით, საწყის ეტაპზე, უახლოეს მომავალში იტალიიდან 95 საქართველოს მოქალაქეს წამოიყვანენ. ამის შესახებ მინისტრის მოადგილემ, ალექსანდრე ხვთისიაშვილმა იმედის ეთერში ისაუბრა.

მოქალაქეებმა, რომლებიც იტალიაში იმყოფებიან იტალიაში საქართველოს საელჩოს ცხელ ხაზზე უნდა მიმართონ და იმეილზე სპეციალური დოკუმენტები წარუდგინონ. მინისტრის მოადგილის თქმით, საქართველოს მოქალაქეებს, რომლებსაც უახლოესი 2 კვირის განმავლობაში შეძენილი ან დაჯავშნილი ჰქონდათ ბილეთები, ქვეყანაში სამინისტრო დააბრუნებს.

"დღევანდელი მდგომარეობით შემიძლია გითხრათ, რომ გვყავს 95 ადამიანი, რომელმაც წარმოადგინა შესაბამისი დოკუმენტაცია იმეილზე, მოხდა ამ ადამიანებთან დაკავშირება. ყველა მათგანს საელჩოს თანამშრომლები ესაუბრნენ. შესაბმისად, ამ 95 ადამიანის წამოყვანას ვგეგმავთ უახლოეს დღეებში", — თქვა ალექსანდრე ხვთისიაშვილმა.

ალქესანდრე ხვთისიაშვილმა აღნიშნა, რომ მას შემდეგ, რაც იტალიასთან პირდაპირი ფრენები დროებით შეჩერდა საელჩოს დაემატა რამდენიმე ცხელი ხაზი და შეიქმნა სპეციალური იმეილი. მინისტრის მოადგილის თქმით, მოქალაქეები დიდი ალბათობით რომიდან სპეციალური რეისით დაბრუნდებიან.

რომში საქართველოს საელჩოს ცხელი ხაზი — +333 8879123

საქართველოს საელჩოს ელექტრონულ მისამართი [email protected]

6 მარტს, უწყებათაშორისი საკოორდინაციო საბჭოს გადაწყვეტილებით, კორონავირუსის გავრცელების პრევენციის მიზნით იტალიასთან პირდაპირი ფრენები დროებით შეჩერდა. პირდაპირი ფრენების შეჩერებასთან ერთად კორონავირუსის მაღალი რისკის ქვეყნებიდან საქართველოში ჩამოსული პირებისთვის 14-დღიანი კარანტინი სავალდებულო გახდა. წესი ვრცელდება, როგორც საქართველოს, ასევე, უცხო ქვეყნის მოქალაქეებზე, თუ მათ არ აქვთ შემოწმების სპეციალური ცნობა.

ამ ეტაპზე საქართველოში კორონავირუსით ინფიცირების 12 შემთხვევაა დადასტურებული. პირველი 26 თებერვალს დაფიქსირდა, მეორე დაავადებათა კონტროლის ცენტრმა 28 თებერვალს დაადასტურა, მესამე — 29 თებერვალს, მეოთხე — 5 მარტს დილით, დანარჩენი 5 კი ამავე დღეს საღამოს. ამასთანავე, 4 მარტს კორონავირუსი დაუდგინდა იტალიაში მცხოვრებ საქართველოს მოქალაქეს. დღეს, 7 მარტს კორონავირუსით ინფიცირების კიდევ 3 შემთხვევა დადასტურდა.

წაიკითხეთ NCDC-სა და WHO-ს რეკომენდაციები კორონავირუსის პრევენციის შესახებ:

ამავე თემაზე: