რამდენიმე დღის წინ ცნობილი გახდა, რომ გამომცემლობა Grand Central, რომელიც მსოფლიოში ერთ-ერთ ყველაზე დიდ საგამომცემლო სახლ Hachette-ს ეკუთვნის, ვუდი ალენის ავტობიოგრაფიული წიგნის გამოცემას აპირებდა. სულ ცოტა ხნის წინ კი გამომცემლობამ ოფიციალური ინფორმაცია გაავრცელა, რომ წიგნს აღარ გამოსცემენ.

ამ გავლენიანი ჰოლივუდელი რეჟისორის ახალი წიგნი Apropos of Nothing 7 აპრილს უნდა გამოცემულიყო, თუმცა საჯარო კრიტიკის შემდეგ გამომცემლობამ თავისი სამომავლო გეგმები შეცვალა:

"ამ გადაწყვეტილების მიღება რთული იყო. ჩვენი გამომცემლობა თითოეულ ავტორთან ურთიერთობას სერიოზულად ეკიდება და დაგეგმილი წიგნების გამოცემას მარტივად არ აუქმებს. ჩვენ აქამდე გამოგვიცია და კვლავ გავაგრძელებთ გამოწვევების წინაშე მყოფ წიგნებს. როგორც გამომცემლები, დარწმუნებულები ვართ, რომ ყოველდღიურად ჩვენი მუშაობის პროცესში განსხვავებული ხმებისა და დაპირისპირებული მოსაზრებების მოსმენა მოგვიწევს. ასევე, როგორც კომპანია, ჩვენს თანამშრომლებს ღია და მხარდამჭერ სამუშაო გარემოს ვთავაზობთ. გასული დღეების განმავლობაში ჩვენს თანამშრომლებთან აქტიური საუბრის შემდეგ გადავწყვიტეთ, რომ ამ დაგეგმილი პროექტს ჩვენი კომპანია ვეღარ განახორციელებს", — ვკითხულობთ გამომცემლობის მიერ გავრცელებულ განცხადებაში.

გამომცემლობა კრიტიკის ქარცეცხლში მას შემდეგ გაეხვა, როცა ცნობილმა ჟურნალისტმა და ვუდი ალენის შვილმა, რონან ფეროუმ გამომცემლობა "ღალატში" დაადანაშაულა: გასულ წელს სწორედ იმავე გამომცემლობამ გამოსცა რონან ფეროუს წიგნი Catch and Kill სექსუალური შევიწროების ცნობილი გამოძიების შესახებ.

რონან ფეროუ, რომელიც ერთ-ერთი პირველი იყო, ვინც ჟურნალისტური გამოძიებით ჰარვი ვაინშტაინის სექსუალური შევიწროების საქმეზე საჯაროდ დაწერა, მხარს უჭერს თავის დას, დილან ფეროუს, რომელიც რეჟისორს ძალადობაში ადანაშაულებს.

დილან ფეროუ და რონან ფეროუ

ფოტო: Getty Images

"მაშინ, როცა მე და შენ ერთად ვმუშაობდით Catch and Kill-ზე — წიგნზე, რომელიც იმ ზიანზეცაა, რომელიც ვუდი ალენმა ჩემს ოჯახს მიაყენა, თურმე ამავდროულად საიდუმლოდ გეგმავდი, რომ იმ ადამიანის მემუარებიც გამოგექვეყნებინა, რომელიც სექსუალური მოძალადეა. ამის შემდეგ შენთან თანამშრომლობა აღარ შემეძლება. წარმოიდგინე, რომ ეს შენს დას შეემთხვა", — ასე მისწერა რონან ფეროუმ გამომცემლობის დირექტორს და მასთან ურთიერთობა გაწყვიტა.

ამ ფაქტიდან მალევე გამომცემლობა Hachette-ს ნიუ-იორკის ოფისი რამდენიმე თანამშრომელმა პროტესტის ნიშნად დატოვა: მათ მხარდაჭერა გამოუცხადეს რონან და დილან ფეროუებს, სექსუალური ძალადობის ფაქტები საჯაროდ დაგმეს და ოფისის წინ საპროტესტო აქცია გამართეს.