ვუდი ალენის შვილმა, ჟურნალისტმა რონან ფეროუმ ცნობილი გამომცემლობა Hachette გააკრიტიკა, რადგან სწორედ ეს გამომცემლობა აპირებს მამამისის ავტობიოგრაფიული წიგნის გამოქვეყნებას.

გამომცემლობა Hachette-მ გასულ წელს თავად რონან ფეროუს გახმაურებული წიგნი Catch and Kill გამოსცა, რომელშიც ჟურნალისტი ჰარვი ვაინშტაინის საქმეზე ჟურნალისტური გამოძიების დეტალებზე მოგვითხრობს. სწორედ ამის გამო, მისი თქმით, განსაკუთრებით "გაუცრუვდა იმედი", რომ იგივე გამომცემლობა გამოსცემდა ვუდი ალენის მემუარებსაც.

როგორც ცნობილია, ფეროუს და, დილან ფეროუ ვუდი ალენს ძალადობაში ადანაშაულებს: მისი თქმით, რეჟისორმა მასზე 1992 წელს იძალადა, როცა ის ჯერ კიდევ შვიდი წლის იყო. დილან ფეროუმაც გააკრიტიკა გამომცემლობა და ამ გადაწყვეტილებას "ღალატი" უწოდა.

"ჩვენ არავის მივცემთ უფლებას, რომ თავისი წიგნით ვინმეს ზიანი მიაყენოს", — განაცხადა გამომცემლობის დირექტორმა, მაიკლ პიჩმა.

არაერთი საჯარო დადანაშაულების მიუხედავად, ვუდი ალენი უარყოფს ბრალდებებს და აცხადებს, რომ დილან ფეროუს მის საწინააღმდეგო განცხადებებს მისი ყოფილი ცოლი, მია ფეროუ შთააგონებს.

რონან ფეროუ ცნობილი ჟურნალისტია, რომელიც ერთ-ერთი პირველი იყო, ვინც ჰოლივუდის ცნობილი პროდიუსერის, ჰარვი ვაინშტაინის წინააღმდეგ სექსუალური შევიწროების ბრალდებებზე The New Yorker-ში დაწერა. ამის გამო მას პულიცერის პრემიაც კი გადაეცა.

The New York Times-ის ცნობით, მას შემდეგ, რაც მან გაიგო, რომ გამომცემლობა Hachette ვუდი ალენის წიგნის გამოქვეყნებას აპირებდა, კომპანიის დირექტორს ოფიციალური წერილი მისწერა:

"მაშინ, როცა მე და შენ ერთად ვმუშაობდით Catch and Kill-ზე — წიგნზე, რომელიც იმ ზიანზეცაა, რომელიც ვუდი ალენმა ჩემს ოჯახს მიაყენა, თურმე ამავდროულად საიდუმლოდ გეგმავდი, რომ იმ ადამიანის მემუარებიც გამოგექვეყნებინა, რომელიც სექსუალური მოძალადეა. ამის შემდეგ შენთან თანამშრომლობა აღარ შემეძლება. წარმოიდგინე, რომ ეს შენს დას შეემთხვა".

სულ ცოტა ხნის წინ გახდა ცნობილი, რომ ვუდი ალენი მემუარების გამოქვეყნებას აპირებს. გამომცემლობის მიერ გამოქვეყნებულ განცხადებაში ვკითხულობთ, რომ 84 წლის რეჟისორი თავის ახალ წიგნში "თავის ოჯახთან და მეგობრებთან ურთიერთობაზეც მოგვითხრობს", რაც აჩენს საფუძვლიან ეჭვს, რომ ალენი ახალ წიგნში სწორედ თავის შვილებთან და ყოფილ ცოლთან ურთიერთობასაც შეეხება.

ლეგენდარული რეჟისორის წიგნი Apropos of Nothing ამერიკის წიგნის მაღაზიების თაროებზე 7 აპრილს გამოჩნდება. როგორც გამომცემლობაში აცხადებენ, რეჟისორის მემუარები ამ გაზაფხულსვე გამოიცემა იტალიაში, კანადაში, საფრანგეთში, ესპანეთსა და გერმანიაში.