ცნობილი საგამომცემლო სახლის Hachette-ს ნიუ-იორკის ოფისი რამდენიმე თანამშრომელმა პროტესტის ნიშნად მას შემდეგ დატოვა, რაც ცნობილი გახდა, რომ გამომცემლობა რეჟისორ ვუდი ალენის ავტობიოგრაფიული წიგნის გამოქვეყნებას აპირებს.

Hachette-ს მფლობელობაში არსებულმა გამომცემლობა Grand Central-მა ამ კვირაში გაავრცელა ინფორმაცია, რომ ლეგენდარული ჰოლივუდელი რეჟისორის, ვუდი ალენის მემუარებს ამ წლის 7 აპრილს გამოაქვეყნებდა.

84 წლის ვუდი ალენს 50-ზე მეტი ფილმი აქვს გადაღებული თავისი კარიერის განმავლობაში და თანამედროვე კინოხელოვნებაში ერთ-ერთ ყველაზე მნიშვნელოვან რეჟისორად ითვლება. ამასთან ერთად მას ხშირად პედოფილიასა და სექსუალურ შევიწროებაში ადანაშაულებენ: მისი შვილი, დილან ფეროუ ამბობს, რომ 1990-იან წლებში, როცა ის 7 წლის იყო, მასზე რეჟისორმა იძალადა.

ვუდი ალენი ამ ფაქტს უარყოფს და 1990-იან წლებში ორჯერ დაწყებული გამოძიების მიუხედავად, მისთვის ბრალი არ წაუყენებიათ. სანაცვლოდ ბოლო წლებში ეს ყველაფერი მის კარიერაზე უარყოფითად აისახა და რამდენიმე მსახიობის პროტესტთან ერთად, მისი ფილმები კინოგაქირავებაშიც ჩავარდა.

Hachette-ს გამომცემლობიდან წასული თანამშრომლები აცხადებენ, რომ მათ არ სურთ ამ "ინტერესთან კონფლიქტში და არასწორ გადაწყვეტილებაში" მონაწილეობა მიიღონ.

საქმე იმაშია, რომ გასულ წელს Hachette-ს მფლობელობაში არსებულმა კიდევ ერთმა გამომცემლობამ, Little, Brown-მა გამოსცა ვუდი ალენის შვილის, რონან ფეროუს წიგნი Catch and Kill, რომელიც ამ ცნობილმა ჟურნალისტმა სექსუალური შევიწროების გახმაურებული ფაქტების გამოძიებას მიუძღვნა.

ფოტო: Katie Warren/Business Insider

სწორედ ამის გამო რონან ფეროუმ გამომცემლობა გააკრიტიკა და მასთან ურთიერთობა შეწყვიტა:

"მაშინ, როცა მე და შენ ერთად ვმუშაობდით Catch and Kill-ზე — წიგნზე, რომელიც იმ ზიანზეცაა, რომელიც ვუდი ალენმა ჩემს ოჯახს მიაყენა, თურმე ამავდროულად საიდუმლოდ გეგმავდი, რომ იმ ადამიანის მემუარებიც გამოგექვეყნებინა, რომელიც სექსუალური მოძალადეა. ამის შემდეგ შენთან თანამშრომლობა აღარ შემეძლება. წარმოიდგინე, რომ ეს შენს დას შეემთხვა", — მისწერა რონან ფეროუმ გამომცემლობის ხელმძღვანელს.

New York Times-თან მიცემულ ინტერვიუში Hachette-ს ხელმძღვანელმა ამ ფაქტზე კომენტარი გააკეთა:

"ყოველ წიგნს თავისი მისია აქვს. გამომცემლობის მოვალეობა კი ისაა, რომ ავტორს თავისი შემოქმედებით დასახული მიზნის მიღწევაში დაეხმაროს."

გამომცემლობის მიერ გამოქვეყნებულ განცხადებაში ვკითხულობთ, რომ 84 წლის რეჟისორი თავის ახალ წიგნში Apropos of Nothing "თავის ოჯახთან და მეგობრებთან ურთიერთობაზეც მოგვითხრობს", რაც აჩენს საფუძვლიან ეჭვს, რომ ალენი ახალ წიგნში სწორედ თავის შვილებთან და ყოფილ ცოლთან ურთიერთობასაც შეეხება.