საქართველოს მართლმადიდებელი ეკლესიის საპატრიარქო არ განიხილავს ზიარების წესის დროებით ცვლილებას ან შეზღუდვას ეკლესიებში, რაც არ უნდა მკაცრი იყოს ჯანდაცვის რეკომენდაციები. ამის შესახებ საპატრიარქოს პრესსპიკერმა, ანდრია ჯაღმაიძემ TV პირველის ეთერში ისაუბრა.

ჯაღმაიძე ერთის მხრივ ამბობს, რომ როგორც სასულიერო პირისთვის, მისთვის რელიგიური რიტუალები უპირატესია, თუმცა ამასთან, მოუწოდებს მოსახლეობას, მაქსიმალურად გაითვალისწინონ ის რეკომენდაცია, რასაც ჯანდაცვის სფერო, ექიმები, სპეციალისტები ავრცელებენ:

"უნდა ვიყოთ ფრთხილად და ავადმყოფობის შემთხვევაში ზიარების საკითხი ინდივიდუალურად გადაწყდება. მივა მოძღვარი და აზიარებს მას. თუმცა სხვა მხრივ, ცვლილებებზე საუბარი არ უნდა გვქონდეს".

29 თებერვალს ცნობილი გახდა, რომ საქართველოს საპატრიარქო საერთო კოვზიდან ზიარების წესის შეცვლას არ აპირებს და კორონავირუსთან დაკავშირებით გავრცელებულ განცხადებაში წერს, რომ სიცოცხლისთვის საშიში ინფექცია აქამდეც არაერთხელ გავრცელებულა. მათი თქმით, ზიარებისთვის ერთი კოვზის გამოყენების პრაქტიკა ათასწლოვან ისტორიას ითვლის, "მორწმუნეები კი ამას არ უშინდებოდნენ".

"საერთო ბარძიმიდან საერთო კოვზით ზიარებას, პირიქით, კიდევ უფრო ხშირად მიეახლებოდნენ, რადგან, როგორც ყველამ ვიცით, წმინდა ზიარებისას ადამიანი იღებს ქრისტეს წმინდა სისხლსა და ხორცს", — აცხადებდნენს აპატრიარქოში.

ჯანდაცვის მსოფლიო ორგანიზაცია მოუწოდებს მოქალაქეებს, რომ კორონავირუსის თავიდან აცილების მიზნით ზოგადი ჰიგიენის წესები დაიცვან.

ზიარების დროს ერთჯერადი კოვზების გამოყენებას რეკომედაციას უწევს თბილისის ინფექციური საავადმყოფოს დირექტორი თენგიზ ცერცვაძეც. თუმცა, ისიც აღნიშნავს, რომ რელიგიის კომპეტენციაში ვერ ჩაერევა. დაავადებათა კონტროლის ცენტრის ხელმძღვანელი, ამირან გამყრელიძე კი ამბობს, რომ რელიგიურ რიტუალებთან დაკავშირებით რეკომენდაციას ვერ გასცემენ.

გაიგეთ მეტი კორონავირუსის პრევენციის შესახებ: