სამოქალაქო მოძრაობის ლიდერი, ალეკო ელისაშვილი არ გამორიცხავს, რომ მმართველ გუნდთან ინდივიდუალური შეხვედრები, გირჩის გარდა სხვა ოპოზიციურმა ძალებმაც გამართეს. როგორც ელისაშვილი ამბობს, ყველამ "პატიოსნად" უნდა იმოქმედოს და სხვებს პირობები "ტელევიზორიდან" არ უნდა უკარანახოს.

როგორც ელისაშვილი ამბობს, არც იმას გამორიცხავს, რომ ოპოზიციაში საერთოდ ვერაფერზე შეთანხმდნენ. მისი თქმით, ოპოზიური ძალები უნდა დაფიქრდნენ იმაზე თუ რა არის "დიდი მიზანი" და რა არის "პატარა მიზანი".

"არ ვიცი, შეიძლება ვიღაცებს ხვდებიან დახურულ კარს მიღმა, ვიღაცებს არ ხვდებიან. გირჩმა პატიოსნად თქვა, შევხვდითო. დანარჩენები ბოლო დრომდე ფეხს ითრევენ და არ იძახიან. არ გამოვრიცხავ, რომ ასეთი შეხვედრები იყო. მე სუს-ის უფროსი არ ვარ, რომ ვიღაცებს ვუთვალთვალებდე, მაგრამ მე და სამოქალაქო მოძრაობიდან არავინ არ შევხვედრივართ. ჩვენ საჯარო სივრცეში ველოდებით მათ მიერ გაკეთებულ განცხადებას და თუ ის ადეკვატური და ნორმალური განცხადება იქნება, არანაირი პრობლემა არ გვაქვს, რომ ჩვენ ამაზე თანახმა ვიქნებით", — განაცხადა ალეკო ელისაშვილმა TV პირველის ეთერში.

ოპოზიციის ლიდერის დაკავება და შეწყვეტილი დიალოგი

ოპოზიციასა და ხელისუფლებას შორის დიპლომატების ორგანიზებული მოლაპარაკებები ოპოზიციონერ გიგი უგულავას დაკავების შემდეგ ჩაიშალა. თბილისის ყოფილ მერსა და ოპოზიციის ერთ-ერთ ლიდერს პატიმრობაში ყოფნა ისევ 3 წლით, 2 თვითა და 8 დღით მოუწევს. საქმეზე, რომელზეც უგულავა რამდენიმე წლის წინ მსჯავრდებული იყო, გადაწყვეტილება უზენაესმა სასამართლომ დღეს, 10 თებერვალს გამოაცხადა.

უგულავას განაჩენის გამოცხადების შემდეგ ოპოზიციამ განაცხადა, რომ საარჩევნო სისტემაზე მთავრობასთან მოლაპარაკებას წყვეტს და საპროტესტო აქციები დაიწყება. მათი თქმით შემდეგომ მოლაპარაკებას აზრი არ აქვს.

სამთავრობო გუნდის ლიდერებმა მომხდარის შეფასება არ ისურვეს და აშშ-ის ელჩთან შეხვედრის დატოვების შემდეგ კი განაცხადეს, რომ მოგვიანებით ისაუბრებენ. დეპუტატებმა კი მომხდარი "ადეკვატურ განაჩენად შეაფასეს".