ევროპული საქართველოს ერთ-ერთი ლიდერის, გიგი უგულავას დაკავების გამო ევროპარლამენტში ქართული ოცნების პარტნიორი პარტიის კიდევ ერთი წევრი, ნაჩო სანჩეს ამორი შეშფოთებას გამოთქვამს. ამის შესახებ სოციალ-დემოკრატიული ალიანსის წევრმა ტვიტერზე დაწერა.

როგორ ნაჩო სანჩესი წერს, ნებისმიერი პოლიტიკური მოთამაშე მოლაპარაკებების მაგიდასთან უნდა იჯდეს და არა ციხეში.

"ძალიან შეშფოთებული ვარ საქართველოში ბოლო დროს განვითარებული პოლიტიკური მოვლენების გამო. ქვეყანას პოლიტიკური ურთიერთობების ხანგრძლივი ისტორია აქვს. სამწუხაროდ, წარსული მტკივნეული აწმყო ხდება. ნებისმიერი პოლიტიკური მოთამაშე, უგულავა კი ერთ-ერთი წამყვანი მოთამაშეა, უნდა იჯდეს მოლაპარაკებების მაგიდასთან და არა ციხის საკანში", — წერს ნაჩო სანჩეს ამორი.

გიგი უგულავას დაკავების გამო ქართული ოცნება პარტნიორი პარტიის კიდევ ერთმა წევრმა, ესტონელმა სოციალ-დემოკრატმა, სვენ მიქსერმაც გააკრიტიკა და თქვა, რომ უგულავას დაკავება არის მოვლენა, რომელიც ძირს უთხრის პოლიტიკურ ნდობას, განსაკუთრებით ოპოზიციური პარტიების მხრიდან. სვენ მიქსერი არის მომხსენებელი საქართველოს საკითხზე, ხოლო ალიანსში, რომელსაც ის წარმოადგენს, ქართული ოცნება შედის.

უგულავას დაკავება და შეწყვეტილი დიალოგი

თბილისის ყოფილ მერსა და ოპოზიციის ერთ-ერთ ლიდერს, გიგი უგულავას პატიმრობაში ყოფნა ისევ 3 წლით, 2 თვითა და 8 დღით მოუწევს. საქმეზე, რომელზეც უგულავა რამდენიმე წლის წინ მსჯავრდებული იყო, გადაწყვეტილება უზენაესმა სასამართლომ დღეს, 10 თებერვალს გამოაცხადა. საკასაციო საჩივარი ყოფილმა გენერალურმა პროკურორმა და ახლადარჩეულმა მოსამართლემ შალვა თადუმაძემ განიხილა.

როგორც მისმა ადვოკატმა, ბექა ბასილაიამ თქვა, უგულავა უზენაესმა სასამართლომ იმ მუხლით გაასამართლა, რომლითაც 9-წლიანი პატიმრობა იყო გათვალისწინებული. თუმცა, ამ მუხლზე ამნისტია გავრცელდა, განახევრდა. იმის გამო, რომ მას მოხდილი ჰქონდა წელიწადი და ოთხი თვე, პატიმრობაში ყოფნა სამ წელზე მეტ ხანს მოუწევს.

უგულავას განაჩენის გამოცხადების შემდეგ ოპოზიციამ განაცხადა, რომ საარჩევნო სისტემაზე მთავრობასთან მოლაპარაკებას წყვეტს და საპროტესტო აქციები დაიწყება. მათი თქმით შემდეგომ მოლაპარაკებას აზრი არ აქვს.

სამთავრობო გუნდის ლიდერებმა მომხდარის შეფასება არ ისურვეს და აშშ-ის ელჩთან შეხვედრის დატოვების შემდეგ კი განაცხადეს, რომ მოგვიანებით ისაუბრებენ. დეპუტატებმა კი მომხდარი "ადეკვატურ განაჩენად შეაფასეს".