სალვადორის პრეზიდენტმა პოლიციისა და ჯარისკაცების დახმარებით ქვეყნის პარლამენტი დროებით დაიკავა. ნაიიბ ბუკელე სამართალდამცავებისთვის შეიარაღების გაზრდისთვის 109 მილიონი დოლარის ოდენობის კრედიტის გამოყოფას ითხოვს.

ჯარისკაცები და პოლიციელები ქვეყნის პარლამენტში მაშინ შევიდნენ, როცა ნაიიბ ბუკელე დეპუტატებს მიმართავდა. მანამდე გეგმის მხარდაჭერისთვის მან კანონმდებლებს შვიდდღიანი ვადა მისცა.

BBC-ის ინფორმაციით, ოპოზიციონერმა პოლიტიკოსებმა პარლამენტში შეიარაღებული სამართალდამცავების გამოჩენას დაშინების უპრეცედენტო შემთხვევა უწოდა. პრეზიდენტის ზეწოლის მეთოდს მხარი დაუჭირა თავდაცვის მინისტრმა და პოლიციის დირექტორმა.

ფოტო: Reuters

სალვადორში მკვლელობის ერთ-ერთი ყველაზე მაღალი მაჩვენებელია მსოფლიოში. მკვლელობების ძირითადი ნაწილი კრიმინალური ჯგუფების მიერ ხორციელდება, რომლებიც ცენტრალურ ამერიკაში არიან გავრცელებული.

პრეზიდენტი ბუკელე თავის უფლებამოსილებას 2019 წლის ივნისში შეუდგა და კორუფციასთან და ძალადობასთან ბრძოლის პირობა დადო.

ბურკელეს კაბინეტმა 9 თებერვლას პარლამენტის სპეციალური სესია მოიწვია მას შემდეგ, რაც განაცხადა, რომ მსგავს სიტუაციაში სალვადორელებს აჯანყების უფლება აქვთ. სესიის პარალელურად კი ქუჩაში საპროტესტო აქცია მიმდინარეობდა.

38 წლის ლიდერს სურს, რომ გამოყოფილი თანხით ჯარისკაცებისა და პოლიციელების შეიარაღება გააუმჯობესოს, რათა კრიმინალთან ბრძოლა უფრო ეფექტური გახდეს. კერძოდ კი, ბურკელე ამტკიცებს, რომ თანხა მანქანების, ფორმების, აღჭურვილობისა და ვერტმფრენის ყიდვას მოხმარდება.

როგორც Reuters წერს, ნაიიბ ბუკელემ პარლამენტში ჯარისკაცებისა და პოლიციის დახმარებით ზეწოლა გააძლიერა, რათა კანონმდებლებს კორუფციასთან ბრძოლის მისი გეგმა მიეღოთ.

გამოცემისვე ინფორმაციით, პრეზიდენტმა პარლამენტში მისთვის განკუთვნილი ადგილი დაიკავა და ხელები აღმართა. როგორც ბუკელემ განმარტა, ის კანონმდებლების მოთმინებისთვის ლოცულობდა.

"თუ ეს სამარცხვინო ხალხი ტერიტორიული კონტროლის გეგმას არ დაამტკიცებს, ჩვენ თქვენ [ხალხს] ისე შეგკრებთ შემდეგ კვირას", — უთხრა ბუკელემ აქციაზე თავის მხარდამჭერებს.

კონგრესის პრეზიდენტის, მარიო პონსეს თქმით, დეპუტატები პრეზიდენტის ინიციატივასა და დეესკალაციაზე ორშაბათს იმსჯელებენ. ამავე დროს, სხვადასხვა ორგანიზაციები სამომავლო კონსტიტუციურ კრიზისზე საუბრობენ. Human Rights Watch-მა პარლამენტის შემთხვევას "უხეში ძალის გამოვლინება" უწოდა.