მთავრობასა და ლობისტებზე ინფორმაციის გავრცელების შემდეგ ქართულმა ოცნებამ ერთიანი ნაციონალური მოძრაობის მსგავს კავშირებზე დაიწყო საუბარი. ეს ყველაფერი დროში დაემთხვა ქართული ოცნების ლობისტურ კომპანიასთან ხელშეკრულების განახლებას, რომელიც გუშინ, 2 თებერვლას გასაჯაროვდა.

მმართველი პარტიის ლიდერმა, მამუკა მდინარაძემ დღეს, 3 თებერვალს გამართულ ბრიფინგზე თქვა, რომ ერთიან ნაციონალურ მოძრაობას ლობისტურ კომპანიასთან ბათუ ქუთელია ხელმძღვანელობს. მან ბრიფინგზე შესაბამისი დოკუმენტიც წარმოადგნია. მდინარაძის თქმით, ბათუ ქუთელიას შუამდგომლობა იმის დადასტურებაა, თუ როგორ მივიდა ნაციონალური მოძრაობა "სისტემური დანაშაულიდან" "სისტემურ მანიპულაციამდე".

ნაციონალური მოძრაობა ლობისტებთან კავშირს არ უარყოფს, თუმცა ამბობს, რომ დოკუმენტის ხელმომწერი მათი ხელისუფლების დროს ერთ-ერთი ლიდერი, ბათუ ქუთელია არაა.

"ბატონი მდინარაძე ტყუის, როდესაც ამბობს, რომ კონტრაქტზე, რომელსაც ნამდვილად გაფორმებული აქვს ერთიან ნაციონალურ მოძრაობას წარმოდგენილია ბატონი ბათუ ქუთელიას ხელმოწერა. არავითარი ბათუ ქუთელიას ხელმოწერა ამ კონტრაქტზე არაა, აქ არის ხელმოწერა ერთიანი ნაციონალური მოძრაობის აღმასრულებელი მდივნის ხელმოწერა", — თქვა ხატია დეკანოიძემ.

დეკანოიძემ ბრიფინგზე ლობისტებთან ქართული ოცნების მიერ გაფორმებული ხელშეკრულება ჟურნალისტებს აჩვენა. მისი თქმით, ამ კონტრაქტში არაფერი არ წერია საქართველოს ნატოში ინტეგრაციაზე, დეოკუპაციაზე და მასში ხელისუფლება ბიუჯეტიდან 2 მილიონ დოლარს იხდის.

ბათუ ქუთელია ატლანტიკური საბჭოს ვიცეპრეზიდენტი და ყოფილი თავდაცვის მინისტრის მოადგილეა. გუშინ, 2 თებერვალს ცნობილი გახდა, რომ საქართველოს მთავრობამ აშშ-სთან ურთიერთობების განმტკიცებისა და კავშირების დამყარებისთვის ლობისტურ კომპანია Chartwell strategy group-თან ხელშეკრულება განაახლა. დოკუმენტი 27 იანვრით თარიღდება და აშშ-ს იუსტიციის დეპარტამენტის გვერდზეა განთავსებული.

ამ ლობისტურ კომპანიას საქართველოს მთავრობა, მომსახურებისთვის ანაზღაურების სახით, 2019 წლის ხელშეკრულებით ყოველთვიურად 65 ათას დოლარს უხდიდა.

ბოლო ორი თვეში საქართველოს მთავრობამ აშშ-დან რამდენიმე კრიტიკული წერილი მიიღო. ბოლო წერილი პრემიერ-მინისტრს სენატის საგარეო ურთიერთობათა კომიტეტის წევრებმა გამოუგზავნეს. წერილში ხაზგასმულია, რომ საქართველოსა და ამერიკის პარტნიორობა შესაძლოა კითხვის ნიშნის ქვეშ დადგეს. მიზეზად სენატორები ბოლოდროინდელ მოვლენებს ასახელებენ, რომლებმაც მათი თქმით, კითხვები გააჩინა საერთო ღირებულებების არსებობაზე.

გაიგეთ მეტი სენატორების წერილზე: