პრემიერ-მინისტრი გიორგი გახარია გაზაფხულზე ამერიკის შეერთებულ შტატებში ოფიციალური ვიზიტით ჩავა. შესაბამისი ინფორმაცია On.ge-ს მთავრობის ადმინისტრაციაში დაუდასტურეს.

მანამდე, ამერიკულმა გამოცემამ, The Hill, გამოაქვეყნა ექსპერტ იანუშ ბუგაჟსკის მოსაზრება, სადაც ნათქვამია საქართველოს პრემიერის ვაშინგტონში ვიზიტის შესახებ.

"გიორგი გახარიას ვაშინგტონში ვიზიტით ხაზი გაესმევა საქართველოს მნიშვნელოვან როლს ამერიკის შეერთებული შტატების საგარეო პოლიტიკაში", — წერია სტატიაში.

პარლამენტის თავმჯდომარის, არჩილ თალაკვაძის განცხადებით, თებერვლიდან აშშ-ს კონგრესში რამდენიმე მაღალი დონის ვიზიტია დაგეგმილი. თალაკვაძის თქმით, ამერიკელ კონგრესმენებთან "ინტენსიურ კომუნიკაციას" გამართავენ და პოლიტიკურ კონტექსტზეც "სრულ არგუმენტაციას" მიაწვდიან.

ვიზიტები მას შემდეგ დაიგეგმა, რაც ამერიკელმა კონგრესმენებმა და სენატორებმა მთავრობას კრიტიკული წერილები გაუგზავნეს. მათი შეშფოთების საფუძელი გახდა პროპორციული არჩევნების დაპირების ჩაგდება, უზენაეს მოსამართლეების არჩევის პროცესი, საპროტესტო აქციების ძალადობრივად დაშლა და ა.შ.

საქართველოს მთავრობის წარმომადგენლებმა, ისევე როგორც პარლამენტის დეპუტატებმა კრიტიკა კონგრესმენების "პირად ინტერესებსა" და "ცალმხრივ ინფორმაციას" დააბრალეს.

კონგრესმენების/სენატორების კრიტიკა

29 იანვარს, შეერთებული შტატების სენატის საგარეო კომიტეტის თავმჯდომარემ, რესპუბლიკელმა სენატორმა ჯიმ რიშმა და ევროპის ქვეკომიტეტის დემოკრატმა ლიდერმა, სენატორმა ჯინ შაჰინმა საქართველოს პრემიერ-მინისტრ გიორგი გახარიას წერილით მიმართეს. წერილი საქართველოს დემოკრატიულ უკუსვლაზე, ოპოზიციის ლიდერების სამართლებრივ დევნაზე საუბრობს და საქართველოს მთავრობას მოუწოდებს დაიცვას დემოკრატიული პრინციპები. სენატორები აცხადებენ, რომ წინააღმდეგ შემთხვევაში შესაძლებელია, ორი ქვეყნის პარტნიორობის საკითხი გადაიხედოს.

გაიგეთ მეტი სენატორების წერილზე:

გაიგეთ მეტი კონგრესმენების წერილებზე: