ზუგდიდში მოძრაობა შეცვალეს წევრები ზუგდიდის მაჟორიტარ, მერაბ ქვარაიას ბიუროსთან აქციას მართავენ. მათი თქმით, ბიუროში შესვლა და განცხადების ჩაბარება სურთ, რის საშუალებას პოლიცია არ აძლევს.

როგორც აქციის მონაწილეები აცხადებენ, სწორედ მერაბ ქვარაიას მონაწილებით ჩავარდა პროპორციულ საარჩევნო სისტემაზე გადასვლა.

"აგვიკრაძელს საჯარო დაწესებულებაში, სადაც ხალხს უნდა იღებედნენ და პასუხს სცემდნენ. როგორც ჩანს შიგნით შევიდა და დაიმალა. ახლა ერთი ადამიანი შემოვიდესო, ჩვენ დათმობებზე წასვლას არ ვაპირებთ. პოლიციას მოვუწოდებთ, მოგვცენ უფლება და შეგვიშვან", — აცხადებენ აქციის მონაწილეები.

პროპორციულის ჩავარდნა, პროტესტი და პოლიტიკური დაპირისპირება — მოკლედ

მას შემდეგ, რაც ქართული ოცნების ე.წ. აჯანყებულმა დეპუტატებმა ჩააგდეს საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო, ოპოზიციისა და სამოქალაქო აქტივისტების საერთო პროტესტი დაიწყო. დაპირისპირებული ოპოზიციური ჯგუფები ერთი მოთხოვნის ირგვლივ გააერთიადნენ — ვადამდელი არჩევნების პროპორციული სისტემითა და ე.წ. გერმანული მოდელით ჩატარება.

პროტესტის ფარგლებში პიკეტირებული იყო მთავარი საკანონმდებლო ორგანო, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

აქციებმა მაჟორიტარი დეპუტატებისა და ოცნების ოფისთან გადაინაცვლა, სადაც აქტივისტებს მმართველი გუნდის მხარდამჭერები ხვდებოდნენ და ფიზიკურად უსწორდებოდნენ. გარდა ამისა, განახლდა საპროტესტო მოძრაობა "არა ნაცებს" და გაიმართა აქციები სახელად "დემიშიზაცია", რომელთა წევრები ნაციონალური მოძრაობის ოფისებს კვერცხებს და ცოცხებს ესროდნენ, მხარდამჭერებსა და აქტივისტებს კი ფიზიკურად უსწორდებოდნენ.