უმრავლესობის წევრმა, გია გაჩეჩილაძემ კონგრესმენ მალენის წერილზე საუბრისას, მას მეტი დაფიქრებისკენ მოუწოდა. მისი თქმით, არ აქვს მნიშვნელობა პოლიტიკოსი ამერიკელია თუ ევროპელი, რადგან განცხადებებისას პოლიტიკოსმა "კორპორაციის ინტერესებით" არ უნდა იმოქმედოს.

როგორც გაჩეჩილაძე ამბობს, კონგრესმენმა კრიტიკული წერილი ნავთობისა და გაზის კომპანია Frontera Resources-ის ინტერესებიდან გამომდინარე დაწერა. მისივე თქმით, ამ კომპანიამ 2015 წელს თავისი განცხადებებით, საქართველოში არსებული გაზის რესურსების შესახებ, ქვეყანა "დიდი დარტყმის ქვეშ დააყენა".

"ცალკეული კონგრესმენების განცხადება, ძალიან მნიშვნელოვანი შეიძლება იყოს გარკვეული ნაწილისათვის. ჩემთვის მნიშვნელოვანია თვითონ აშშ-ს მთლიანად კონგრესის გადაწყვეტილებები, ორპარტიული რეზოლუციები. ბოლო რეზოლუციითაც, ფაქტიურად, აშშ აღიარებს საქართველოში თავისუფალ ბიზნესს. როდესაც, 2015 წელში ამ Frontera-ს წარმომადგენელმა საქართველოში განაცხადა, რომ საქართველოში არის იმდენი რაოდენობის გაზი, რომელიც აჭარბებს: უზბეკეთის, აზერბაიჯანის, ლიბიის, ჩინეთის რესურსებს. რესურსების გადანაწილების გამო მიდის გარკვეული ომები და ბრძოლები. ეს ძალიან დიდი საფრთხის შემცველია", — განაცხადა გაჩეჩილაძემ TV პირველის ეთერში.

აშშ-ს კონგრესის წარმომადგენლობითი პალატის წევრი, რესპუბლიკელი მარკვეინ მალინი საქართველოს პრემიერ-მინისტრ, გიორგი გახარიას წერილს უგზავნის, რომელშიც დემოკრატიული ღირებულებებისგან გადახვევისა და ეკონომიკური მდგომარეობის გაუარესების გამო თავის შეშფოთებას გამოხატავს.

როგორც კონგრესმენი წერს, დამოუკიდებლობის შემდეგ მიღწეული პროგრესის მიუხედევად, საქართველომ დემოკრატიისა და თავისუფალი საბაზრო ეკონომიკის ინდიკატორების მიმართ ნეგატიური ტენდენციები გამოავლინა, რომელიც აშშ-ში შეუმჩნეველი არ დარჩენილა. მას მაგალითად მოჰყავს ნავთობისა და გაზის კომპანია Frontera Resources-ის მაგალითი და ფეისბუქის მიერ პროსახელისუფლებო გვერდების წაშლა.