20 ივნისის მოვლენების გამო პარლამენტიდან და პარტიიდან წასული ზაქარია ქუცნაშვილი აცხადებს, რომ საკანონმდებლო ორგანოში ქართული ოცნების პარტიული სიით დაბრუნებას არ აპირებს. მისი თქმით, საპარლამენტო მანდატზე მეორედ ამბობს უარს.

"მაჟორიტარული წესით გამარჯვებულმა დეპუტატმა პარლამენტის წევრობაზე უარი თქვას და მეორე წელს თუნდაც იმის გამო, რომ პარტიული სიით განსაზღვრული რიგითობა მოუწევს, დაეთანხმოს პარლამენტის წევრად კვლავ გახდომას — სამართლიანად არ მიმაჩნია!" — აცხადებს ქუცნაშვილი.

მისივე თქმით, მიუხედვად "ცდუნებისა" არ უნდა, რომ პრეცენდენტის დაშვებით "მახინჯ ტრადიციას მისცეს დასაბამი".

"მიუხედავად იმისა, რომ დღეს მოქმედი კანონი ამის უფლებას მაძლევს და თანაც დიდია ცდუნება იმისა, რომ საპარლამენტო ტრიბუნიდან ვუპასუხო პოლიტიკანების ცრუ ბრალდებებს, მეორედ ვაცხადებ უარს მე-9 მოწვევის პარლამენტის წევრობაზე", — აცხადებს ის.

გარდა ამისა, ქუცნაშვილმა მიმართავს ყოფილ თანაგუნდელებს, როგორც "ქართული ოცნების ერთ-ერთმა დამფუძნებელმა" და სთხოვა მათ პარტიული სიიდან ამოიღონ.

ამ საკითხზე ისაუბრა პარლამენტის თავმჯდომარე არჩილ თალაკვაძემაც და განაცხადა, რომ პარლამენტიდან საკუთარი ნებით წასული დეპუტატის უკან დაბრუნების პრეცენდენტი არასდროს ყოფილა და ამის "აუცილებლობა" არც ქართულ ოცნებას აქვს. მისივე თქმით, ქუცნაშვილმა საპარლამენტო მანდატის დატოვებისას "ღირსეული" გადაწყვეტილება მიიღო და არ ჰგონია, რომ ამ გადაწყვეტილებას ახლა შეიცვლის.

ქართული ოცნების წევრის, ოთარ ჩრდილელის მიერ პარლამენტის სადეპუტატო მანდატის დატოვების შემდეგ, ქართული ოცნების პროპოცრიული სიით პარლამენტში შესვლა ზაქარია ქუცნაშვილს ეკუთვნის. თუმცა, ქუცნაშვილმა დეპუტატის მანდატი და ქართული ოცნებას მას შემდეგ დატოვა, რაც მისი ინიციატივით ჩატარებული მართლმადიდებლობის საპარლამენტთაშორისო ასამბლეის დროს რუსი დეპუტატი სერგეი გავრილოვი პარლამენტის სპიკერის სკამში ჩაჯდა, სპეცრაზმმა საპროტესტო აქცია დაშალა და საზოგადოებამ მისი გადადგომა მოითხოვა.