პარლამენტის თავმჯდომარე, არჩილ თალაკვაძე ზაქარია ქუცნაშვილის შესაძლო დაბრუნებასთან დაკავშირებით ამბობს, რომ პარლამენტიდან საკუთარი ნებით წასული დეპუტატის უკან დაბრუნების პრეცენდენტი არასდროს ყოფილა და ამის "აუცილებლობა" არც ქართულ ოცნებას აქვს. მისივე თქმით, ქუცნაშვილმა საპარლამენტო მანდატის დატოვებისას "ღირსეული" გადაწყვეტილება მიიღო და არ ჰგონია, რომ ამ გადაწყვეტილებას ახლა შეიცვლის.

"მართალია, რომ მას პროპორციული სიით ეკუთვნის პარლამენტში შემოსვლა. თუმცა, ასეთი პრეცენდენტი არ ყოფილა, რომ პარლამენტარს ეთქვას უარი თავის მანდატზე და შემდეგ პროპორციული სიით ხელახლა შემოსულიყოს პარლამენტში. ვფიქრობ, ქართული ოცნებაც არ არის ის პოლიტიკური პარტია, რომელსაც ამის აუცილებლობა აქვს დღეს, რომ ხელმეორედ შემოყვანის დეპუტატი", — განაცხადა თალაკვაძემ.

ქართული ოცნების წევრის, ოთარ ჩრდილელის მიერ პარლამენტის სადეპუტატო მანდატის დატოვების შემდეგ, ქართული ოცნების პროპოცრიული სიით პარლამენტში შესვლა ზაქარია ქუცნაშვილს ეკუთვნის. პარტიის პროპორციულ სიაში ჩრდილელის შემდეგ ქუცნაშვილია.

2019 წელს ზაქარია ქუცნაშვილმა დეპუტატის მანდატი და ქართული ოცნებას მას შემდეგ დატოვა, რაც მისი ინიციატივით ჩატარებული მართლმადიდებლობის საპარლამენტთაშორისო ასამბლეის დროს რუსი დეპუტატი სერგეი გავრილოვი პარლამენტის სპიკერის სკამში ჩაჯდა, სპეცრაზმმა კი საპროტესტო აქცია დაშალა.