პრემიერ-მინისტრი, გიორგი გახარია აცხადებს, რომ პროფესიული განათლების მასწავლებლებს საათობრივი ანაზღაურება გაეზრდებათ და სრულ განაკვეთზე მომუშავე პედაგოგების საშუალო ხელფასი დაახლოებით 1 800 ლარი იქნება. ამის შესახებ პრემიერმა მთავრობის სხდომის დაწყების წინ ისაუბრა.

როგორც პრემიერმა აღნიშნა, საკითხი განათლების სამინისტროს მიერაა წარმოდგენილი.

"მოგეხსენებათ, რომ ჩვენ ვახორციელებთ სისტემურ რეფორმას განათლების სისტემაში და ყველაზე მნიშვნელოვანი ნაწილი ეს გახლავთ საშუალო განათლების კომპონენტი და უკვე 2020 წლიდან უკვე ჩვენ განსაკუთრებულ ყურადღებას ვუთმობთ განათლებას, რაც უნდა გახდეს საფუძველი დასაქმების გასაზრდელად, ასევე იმ დისბალანსის აღმოსაფხვრელად, რაც ჩვენ შრომის ბაზარზე გაგვაჩნია", — განაცხადა გიორგი გახარიამ.

2020 წლის სახელმწიფო ბიუჯეტში სკოლისა და საბავშვო ბაღის მასწავლებლების ხელფასების ზრდაა გათვალისწინებული. საჯარო სკოლების 43 ათასამდე უფროსი, წამყვანი და მენტორი მასწავლებლების დანამატი გაიზრდება 150 ლარით. პირველი სექტემბრიდან 100 ლარით გაიზრდება საბავშვო ბაღებში დასაქმებულთა ანაზღაურება (მასწავლებლები, აღმზრდელები და სხვა, 32 ათასზე მეტი მოქალაქე).