ქართული ოცნების გენერალურმა მდივანმა, კახა კალაძემ გაიმეორა თანაგუნდელების მესიჯბოქსი და ასობით ფეუსბუქგვერდის წაშლაზე თქვა, რომ ფეიქნიუსის მთავარი იდეოლოგი ნაციონალური მოძრაობაა. ამის შესახებ მან დღეს, 22 დეკემბერს ჟურნალისტებთან ისაუბრა.

"არანაირი კავშირი და არანაირი დამოკიდებულება ამ "ექაუნთებთან" დაკავშირებით არ მაქვს და არც ვიცი, რა "ექაუნთებზეა" საუბარი... ზოგადად, ფეიკნიუსის მთავარი იდეოლოგები ვიცით ჩვენ რომელი პარტიაა და ამას ჰქვია ნაციონალური მოძრაობა და მისი განშტოებები. რა თქმა უნდა, თუ ამის დარეგულირება შესაძლებელია და მოხერხდება, მე ვფიქრობ, ევროპულ ქვეყნებში გარკვეული ცვლილებები იქნა განხორციელებული და შეგვიძლია გადმოვიტანოთ საუკეთესო მაგალითები".

კალაძეს ჟურნალისტებმა დაუსვეს კითხვა იამზეც, რომ სხვა გვერდებთან ერთად ფეისბუქმა წაშალა "Bidzina Ivanishvili & Media", რაზეც კალაძემ თქვა, რომ ბიძინა ივანიშვილს არ ჰქონია ოფიციალური გვერდი.

20 დეკემბერს ფეისბუქმა ასეულობით გვერდი და ანგარიში დაბლოკა, რომელიც მათი განცხადებით, მმართველ გუნდთან იყვნენ კავშირში და დეზინფორმაციას ავრცელებდნენ. მათი თქმით, ამ გვერდებისა და ანგარიშების რეკლამირებაში თითქმის $316 ათასი დაიხარჯა.

ფეისბუქის განცხადებაში ნათქვამია, რომ ამჟამად უკვე წაშლილი გვერდები მმართველ ძალასთან, ქართულ ოცნებასთან იყვნენ დაკავშირებულები, თუმცა თავს პარტიებად, მედიებად, რეალურ პირებად და აქტივისტთა ჯგუფებად აჩვენებდნენ.

"მიუხედავად იმისა, რომ ანგარიშების უკან მდგომი ადამიანები ცდილობდნენ, შეენიღბათ კოორდინირებული მუშაობა, კვალს სარეკლამო კომპანია პანდასთან და ქართული ოცნების ხელისუფლებასთან მივყავართ", — ნათქვამია განცხადებაში.

როგორც ატლანტიკური საბჭოს ციფრული გამოძიების კვლევის ლაბორატორია აცხადებს, გვერდები უმეტესად ქართულ აუდიტორიაზე მუშაობდნენ და ავრცელებდნენ ისეთ სოციო-პოლიტიკურ კონტენტს, რომელიც საზოგადოების პოლარიზაციას უწყობდა ხელს, თავს ესხმოდა ოპოზიციურ პარტიებსა და სამოქალაქო საზოგადოებას და საქართველოს დასავლელი პარტნიორების, კონკრეტულად კი ამერიკის შეერთებული შტატების დისკრედიტაციას ეწეოდა.