სახელმწიფო ინსპექტორის, ლონდა თოლორაიას ინფორმაციით, 15 წლის ლუკა სირაძე გამოკითხვის დროს დაახლოებით 20 წუთის განმავლობაში პოლიციაში მარტო იყო. ლონდა თოლორაიას თქმით, არასრულწლოვანს დაუსვეს გარკვეული კითხვები და მონაცემების მოსატანად მშობელი სახლში წავიდა პოლიციის თხოვნის საფუძველზე:

"დაახლოებით 20 წუთის განმავლობაში მშობელმა დატოვა პოლიციის განყოფილება და ბავშვი რჩება პოლიციის დაწესებულებაში მარტო. ჩვენ გვაქვს კამერების ჩანაწერები, თუ როგორ ხდება და რა ხდება ბავშვთან მიმართებით. აკრძალულია სამუშაო სივრცეში თანამშრომლების აუდიო მოსმენა, ამიტომ ეს არცერთ დაწესებულებაში არ ხდება, შესაბამისად არც პოლიციაში".

ლონდა თოლორაიას თქმით, ფსიქოლოგი არც სკოლაში და არც პოლიციის განყოფილებაში არ ესწრებოდა გამოკითხვას.

სახელმწიფო ინსპექტორის განცხადებით, ამ ეტაპზე ჩატარებული გამოძიებით დასტურდება შემდეგი:

"2019 წლის 10 დეკემბერს, დილით, მწვანე სკოლის ადმინისტრაციამ აღმოაჩინა, რომ სკოლის გარე და შიდა პერიმეტრი მოხატული იყო. ჩამდენი პირის იდენთიფიცირების მიზნით, სკოლის ადმინისტრაციამ დაათვალიერა სათვალთვალო ვიდეოკამერები. ასევე, დაიწყო ბავშვების გამოკითხვა ჯგუფურად, ბავშვებისათვის ამ აუდიო-ვიდეო ჩანაწერებზე აღბეჭდილი სურათის წარდგენა. შემდეგ მათ გამოიძახეს პოლიცია, ვინაიდან ჩაითვალა, რომ მიღწეული ზიანი იძლეოდა პოლიციის გამოძახების საჭიროებას. პოლიციას ადმინისტრაციამ გადასცა სათვალთვალო კამერების ჩანაწერები, ყოველგვარი სამართლებრივი საფუძლის გარეშე, პოლიციის ხელში მოხვდა არასრულწლოვანთა კომუნიკაციის ამსახველი ჩანაწერები. შემდეგ პოლიციაში შედის ოფიციალური შეტყობინება და იწყება გამოძება".

15 წლის ლუკას საქმე

15 წლის ბიჭი, რომელიც დაკითხვის შემდეგ კორპუსიდან გადმოხტა 17 დეკემბერს გარდაიცვალა. ახალგაზრდა იურისტთა ასოციაციის განცხადებით, არასრულწლოვანმა თვითმკვლელობა, საგამოძიებო ორგანოს თანამშრომლების მხრიდან ფსიქოლოგიური ძალადობის გამო სცადა.

პოლიციას გამოძიების დაწყების მოთხოვნით მწვანე სკოლამ მიმართა, რომლის ტერიტორიაზეც გვიან ღამით არასრულწლოვანმა სხვადასხვა წარწერები დატოვა. გავრცელებული ინფორმაციით, ეს 15 წლის ლუკა სირაძემ გააკეთა, რომელიც მწვანე სკოლის ყოფილი მოსწავლე იყო.

საიას ინფორმაციით, დაკითხვაზე ლუკა სირაძე ყოფილ თანაკლასელს დააპირისპირეს და მასზე ფსიქოლოგიურად იძალადეს, რის შემდეგაც ის მეცხრე სართულიდან გადმოხტა. რამდენიმე დღის განმავლობაში ის კომატოზურ მდგომარეობაში იყო.

შინაგან საქმეთა სამინისტრო ამტკიცებდა, რომ ბავშვი მშობელთან ერთად გამოკითხეს და ფსიქოლოგიური ძალადობას ადგილი არ ჰქონია. მათ გამოძიება თვითმკვლელობამდე მიყვანის მუხლით დაიწყეს. გამოძიებას სწორედ ის განყოფილება აწარმოებს, სადაც არასრულწლოვანზე, სავარაუდოდ, ფსიქოლოგიურად იძალადეს.

სახელმწიფო ინსპექტორის აპარატმა კი გამოძიება სისხლის სამართლის კოდექსის 335-ე მუხლით დაიწყო, რაც ჩვენების მიცემის იძულებას გულისხმობს. მოზარდის გარდაცვალების შემდეგ ამ საქმეზე გამომძიებელი მარიანა ჩოლოიანი დააკავეს და 2 სამართალდამცავს უფლებამოსილება დროებით შეუჩერეს. ჩოლოიანი ბრალს არ აღიარებს.

ვინ არის მარიანა ჩოლოიანი

საქართველოს ახალგაზრდა იურისტთა ასოციაციის ინფორმაციით, არიანა ჩოლოიანი ფიგურირებს 2011 წლის 26 მაისს ე.წ. ყინწვისის სპეცოპერაციის დროს დაკავებული ნიკოლოზ გოგუაძის საქმეში.

ორგანიზაციის განცხადებით, გოგუაძე 2011 წლის 26 მაისს, ე. წ. ყინწვისის სპეცოპერაციის დროს, ყინწვისის სამონასტრო კომპლექსის მიმდებარე ტერიტორიაზე დააკავეს. როგორც საიაში ამბობენ, დასჯისა და აღიარებითი ჩვენების მოპოვებისთვის გოგუაძეზე იყო როგორც ფიზიკური, ისე ფსიქოლოგიური ძალადობა.

ორგანიზაციის განცხადებით, ჩოლოიანმა სასამართლოში ძალადობა უარყო. ამავე დროს, კი 2019 წელს ადამიანის უფლებათა ევროპულმა სასამართლომ არასათანადო მოპყრობა დადგენილად მიიჩნია.