15 წლის მოზარდის საქმეში ბრალდებული გამომძიებელი, მარიანა ჩოლოიანი, წარდგენილ ბრალს, ჩვენების მიცემის იძულებასთან დაკავშირებით, არ აღიარებს.

მისი ადვოკატის, არჩილ შაბაშვილის განცხადებით, ჩოლოიანი გამორიცხავს საკუთარ მონაწილეობას ამ ქმედებაში, რადგან მას ბრალიც კი არ წარუდგენია მოზარდისათვის და არ უცდია აღიარებითი ჩვენების მოპოვება.

"მნიშვნელოვანია გაირკვეს სკოლის წვლილიც, რადგანაც, როცა ადგილზე მივიდნენ, თავად სკოლის ადმინისტრაციამ დაახვედრა ამოღებული კადრები და ინფორმაცია თუ ვინ იყო ამ კადრებზე აღბეჭდილი, ასევე დაახვედრა პირადი მიმოწერის ამსახველი ფეისბუქსქრინშოტები", — ამბობს ჩოლიანის ადვოკატი, არჩილ შაბაშვილი.

ადვოკატის თქმით, ის გეგმავს, რომ შეისწავლოს ჩანაწერი, სადაც ასახულია, რომ მოზარდი მარტო არ იმყოფებოდა გამოკითხვაზე.

ბრალდებული მარიანა ჩოლოიანი მეორე დღეა კლინიკაში იმყოფება. გავრცელებული ინფორმაციით, დაკავების შემდეგ ის შეუძლოდ გახდა.

15 წლის ბიჭი, რომელიც დაკითხვის შემდეგ კორპუსიდან გადმოხტა, გუშინ, 17 დეკემბერს გარდაიცვალა.

გუშინ მოზარდის გარდაცვალების შემდეგ აქციები გაიმართა იაშვილის კლინიკასთანაც, სადაც მოქალაქეებმა თეთრი მიხაკები და სანთლები მიიტანეს. პარალელურად კი აქტივისტებმა შინაგან საქმეთა სამინისტროსთან და მწვანე სკოლასთან წარწერები — "ამ ცხოვრების დედაც!" დატოვეს.

მოზარდის გარდაცვალების საქმეზე გუშინვე გამომძიებელი დააკავეს. სახელმწიფო ინსპექტორის, ლონდა თოლორაიას განმარტებით, დიდუბე-ჩუღურეთის სამმართველოს პოლიციის პირველი განყოფილების გამომძიებელი მარიანა ჩოლოიანი სისხლის სამართლის კოდექსის 335-ე მუხლის ბრალდებით დააკავეს, რაც ჩვენების მიცემის იძულებას გულისხმობს.

ახალგაზრდა იურისტთა ასოციაციის განცხადებით, არასრულწლოვანმა თვითმკვლელობა, სავარაუდოდ, საგამოძიებო ორგანოს თანამშრომლების მხრიდან ფსიქოლოგიური ძალადობის გამო სცადა.

შემთხვევა 2019 წლის 11 დეკემბერს მოხდა. მანამდე მოზარდი გვიან ღამით თავისი ყოფილი სკოლის, მწვანე სკოლის შენობაში შევიდა შიდა და გარე ტერიტორიაზე წარწერები დატოვა. ამასთან დაკავშირებით სკოლამ პოლიციაში დარეკა და გამოძიება დაიწყო.