მდინარაძის ოფისთან შეკრებილი უცხო პირები, რომლებიც აქტივისტებს არ ატარებენ და უპირისპირდებიან, სხვადასხვა მიზეზებს იგონებენ იმისთვის, რომ მათი ქმედება განმარტონ. ზოგიერთი მათგანი ამბობდა, რომ იქ მაცხოვრებელი იყო და "უბნის აწიოკება" არ სიამოვნებდა. ზოგი ამტიცებდა, რომ "უბრალოდ, აინტერესებდა რას აპირებდნენ" და ამიტომ უღობავდა მათ გზას. ერთ-ერთმა კი განაცხადა: "ქეიფს ვაპირებ და არ მინდა შენნაირი სტუმარი".

აქტივისტები ამბობენ, რომ ეს არის წინასწარ დადგმული პროვოკაცია და დაპირისპირების მოწყობის მცდელობა.

"საყვირი არ გვაქვს, მეგაფონი არ გვაქვს და მოვედით, რაღაც კითხვები გვქონდა მდინარაძესთან. მაჟორიტარის ბიუროა და უფლება არ გვაქვს შევხვდეთ? რაზმი დაგვახვედრეს", — განაცხადა ბექა ნათელაშვილმა.

მათ გააპროტესტეს ის ფაქტიც, რომ ეს პირები ნაციონალური მოძრაობის წევრებს ეძახდნენ მაშინ, როცა მათი ნაწილი ლეიბორისტული პარტიიდანაა, ნაწილი კი სხვა პოლიტიკური პარტიის ახალგაზრდულ ფრთას წარმოადგენს.

ადგილზე მობილიზებულია პოლიცია, თუმცა კადრებში ჩანს, რომ მათ არ შეაჩერეს ის პირები, რომლებიც აქტივისტებს გზას უღობავდენ. პოლიცია პროცესში მხოლოდ მას შემდეგ ჩაერთო, როცა სიტუაცია ფიზიკურ დაპირისპირებაში გადაიზარდა.

სხვა სიტუაციებისგან განსხვავებით, პოლიცია არ აკავებს ამ პირებს და ისინი, ვინც ყვირიან ტერიტორიიდან ოდნავ მოშორებით გაჰყავს.

ბოლო დღეების მოვლენები

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებსა და ქართული ოცნების დეპუტატების ოფისებს ბოქლომებს ადებენ.

მას შემდეგ, რაც პარლამენტის პიკეტი მესამედ დაანონსდა, ხელისუფლებამ პარლამენტის მიმდებარე ქუჩები რკინის კონსტრუქციებით ჩაკეტა. კონსტრუქციები ხელს უშლიდა მოქალაქეებს გადაადგილებაში. პოლიციამ გზები აქციის დაშლის შედეგ გაათავისუფლა.