მოძრაობა გაბედეს აქტივისტებს მმართველი პარტიის დეპუტატის, მამუკა მდინარაძის ოფისთან უცხო პირები დახვდნენ, რომელიც ახლოს მისვლის უფლებას არ აძლევენ. აღნიშნულმა პირებმა აქტივისტებს გზა გადაუღობეს, უთხრეს, რომ "დაინტრესებული ადგილობრივები" იყვნენ და მოითხოვეს ანგარიში ჩაებარებინათ იმაზე, თუ რას აპირებდნენ.

"აქ ვცხოვრობ, არ გიცნობ და მაინტერესებს სად მიდიხარ... ეს ხელში რაები გიჭირავს? მომეცი, სულ მომეცი", — ეუბნებოდა ერთ-ერთი აქტივისტებს.

მალევე საუბარში კიდევ რამდენიმე პირი ჩაერთო, რომლებმაც აქტივისტებს დაკითხვა მოუწყვეს.

"გამაგებინეთ რაა და მე შევყვები", — ამბობდა ერთ-ერთი. მეორე კი იძახდა: "ახალგაზრდებს კი არა ამათი... დავაი ახლა აქედან".

ადგილზე მობილიზებული იყო პოლიცია, თუმცა კადრებში ჩანს, რომ მათ არ შეაჩერეს ის პირები, რომლებიც აქტივისტებს გზას უღებავდნენ. პოლიცია პროცესში მხოლოდ მას შემდეგ ჩაერთო, როცა სიტუაცია ფიზიკურ დაპირისპირებაში გადაიზარდა.

როდესაც პოლიცია ერთ-ერთი აგრესიული პირის დაშოშმინებას ცდილობდა ის ყვიროდა: "უბანი აგვიწიოკეთ ბიჭო".

გაბედეს აქტივისტები მდინარაძის ოფისთან 41 ვერცხლის დატოვებას აპირებდნენ.

ბოლო დღეების მოვლენები

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებსა და ქართული ოცნების დეპუტატების ოფისებს ბოქლომებს ადებენ.

მას შემდეგ, რაც პარლამენტის პიკეტი მესამედ დაანონსდა, ხელისუფლებამ პარლამენტის მიმდებარე ქუჩები რკინის კონსტრუქციებით ჩაკეტა. კონსტრუქციები ხელს უშლიდა მოქალაქეებს გადაადგილებაში. პოლიციამ გზები აქციის დაშლის შედეგ გაათავისუფლა.