ქართული ოცნების ფრაქციის თავმჯდომარის, მამუკა მდინარაძის განცხადებით, ისინი ეხვეწებიან თანაგუნდელებსა და მომხრეებს, რომ თავი შეიკავონ და პროვოკაციებს არ წამოეგონ. მისივე თქმით, "ეკლესიის წინააღმდეგ მებრძოლი", "ტერიტორიების გამყიდველი" და "ტყუილებით მოქმედი ადამიანებისგან" შეურაცხყოფას ოცნების დეპუტატები უფრო მძაფრად აღიქვამენ. ამ შემთხვევაში მდინარაძე ოპოზიციას გულისხმობ

"ჩვენ დღეს ვლაპარაკობთ იმაზე, როგორ უნდა მოვუწოდოთ ჩვენს თანაგუნდელებს, რომ თავი შეიკავონ პროვოკაციებზე წამოგებისგან. ჩვენ დღეს გვიწევს ხვეწნა ჩვენს მომხრეებთან, უამრავ ადამიანთან და ჩვენს თანაგუნდელებთან, რომ თავი შეიკავონ პროვოკაციებზე წამოგებისგან... უმრავლესობის სხდომის ერთ-ერთი სამუშაო თემა ესეც იყო", — განაცხადა მდინარაძემ ჟურნალისტებთან.

მსგავსი კომენტარი გააკეთა პარლამენტის ყოფილმა თავმჯდომარე ირაკლი კობახიძემაც. მისი თქმით, უმრავლესობის წევრების "ემოციების დარეგულირება უწევთ" საპროტესტო აქციებთან დაკავშირებით.

დღეს, 29 ნოემბერს პარლამენტთან აქცია განახლდა, თუმცა, ქართული ოცნების დეპუტატები შენობაში მანამდე შევიდნენ, სანამ პიკეტი დაიწყებოდა. მოგვიანებით, აქციის მონაწილეებმა პარლამენტის ეროვნულ ბიბლიოთეკასთან გადაინაცვლეს. მათთვის ცნობილი გახდა, რომ თეა წულუკიანი იქ შეხვედრაზე მიდიოდა. მათი თქმით, ყველგან და ყოველთვის შეუქმნიან დისკომფორტს ქართული ოცნების წევრებს. ბიბლიოთეკასთან პოლიციაა მობილიზებული.

ბოლო დღეების მოვლენები

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებსა და ქართული ოცნების დეპუტატების ოფისებს ბოქლომებს ადებენ.

მას შემდეგ, რაც პარლამენტის პიკეტი მესამედ დაანონსდა, ხელისუფლებამ პარლამენტის მიმდებარე ქუჩები რკინის კონსტრუქციებით ჩაკეტა. კონსტრუქციები ხელს უშლიდა მოქალაქეებს გადაადგილებაში. პოლიციამ გზები აქციის დაშლის შედეგ გაათავისუფლა.