ქართული ოცნების ლიდერი ირაკლი კობახიძე ამბობს, რომ მათ უმრავლესობის წევრების "ემოციების დარეგულირება უწევთ" საპროტესტო აქციებთან დაკავშირებით. ამის შესახებ მან დღეს, 29 ნოემბერს პარლამენტში გამართული უმრავლესობის სხდომის შემდეგ განაცხადა:

"გვიწევს დეპუტატების შეკავება იმისათვის, რომ არ გამოხატონ ემოციები, გარე აქციასთან დაკავშირებით. ეს 100 დეპუტატი ეყოფა იმ 198 კაცს, რომლებიც არიან პარლამენტის გარშემო, თუ ემოციებზე არის საუბარი... შეაფასონ საკუთარი რესურსები და 200 კაცით მუშტებს ნუ აბრახუნებენ", — თქვა კობახიძემ ოპონენტებზე.

პროპორციულ საარჩევნო სისტემაზე გადასვლის მოთხოვნით მთელი ოპოზიციური სპექტრი გაერთიანდა ლოზუნგით "ყველა მინუს ერთი!". საერთო მიზნით, დაინიშნოს ვადამდელი არჩევნები პროპორციული სისტემით, გაერთიანდნენ თავისუფალი დემოკრატები, რესპუბლიკელები, ევროპული საქართველო, ნაციონალური მოძრაობა, ახალი საქართველო, ლეიბორისტული პარტია, გირჩი, კანონი და სამართალი, ასევე, მათ გვერდით დადგნენ: ნინო ბურჯანაძე, გუბაზ სანიკიძე, ეკა ბესელია.

ნოემბრის მოვლენები

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებს ბოქლომებს ადებენ. პროტესტის მონაწილეებმა სიმბოლურად უკვე "დააბოქლომეს" პროკურატურა, სახელმწიფო უსაფრთხოების სამსახური, მთავრობის კანცელარია. ასევე, ისინი ბოქლომს ადებენ მაჟორიტარი დეპუტატების ოლქებს.

ოპოზიციამ და მათმა მხარდამჭერებმა აჭარის უმაღლესი საბჭოს ჭიშკარზე ბოქლომი ჩამოკიდეს. გარდა ამისა, ბოქლომები დაადეს პარლამენტის თავმჯდომარის, არჩილ თალაკვაძისა და დეპუტატ მიხეილ ყაველაშვილის ბიუროს ოფისებს. "დაბოქლომებულია" ასევე მთავრობის კანცელარია, პროკურატურა და პრეზიდენტის რეზიდენცია.