ქართული ოცნების გენერალური მდივანი კახა კალაძე ოპოზიცისა და სამოქალაქო აქტივისტების მიერ შეთევაზებულ ე.წ. გერმანულ მოდელს "ფიზიკური დესტრუქციისთვის იურიდიული საბაბის" ძებნას უწოდებს. კალაძე ამტკიცებს, რომ ეს მოდელი მოქმედ კონსტიტუციას ეწინააღმდეგება, თუმცა არ განმარატავს როგორ.

"აქ ნათლად იკითხება ნაციონალური მოძრაობის ჩვეული ხელწერა, რომელიც სიცრუის ტირაჟირებით ცდილობს საზოგადოების შეცდომაში შეყვანას. ეს არის შეგნებული სიცრუე, რაც უმარტივესი სამართლებრივი, ლოგიკური და არითმეტიკული ანალიზითაც კი დასტურდება. შესაბამის არგუმენტებს აქტიურად ვუზიარებთ საზოგადოებას და მზად ვართ ეს არგუმენტები ყველა დაინტერესებულ პირს სხვადასხვა საჯარო პლატფორმის მეშვეობით წარვუდგინიოთ", — განცხადა მან.

გარდა ამისა, კალაძემ განაცხადა, რომ "თემა დახურულია" და 2020 წელს არჩევნები შერეული სისტემით ჩატარდება. ამის მიზეზად მან ის დაასახელა, რომ "უმრავლესობაში არსებული განწყობების გათვალისწინებით" ახალი საკონსტიტუციო ცვლილებებისთვის 113 ხმის მობილიზების რესურსი არ არსებობს. მანვე აღნიშნა, რომ საარჩევნი რეფორმის საკითხი საერთო-სახალხო კენჭისყრაზე 2020 წლის საპარალამენტო ან 2021 წლის ადგილობრივი არჩევნების დროს დადგება.

მისივე თქმით, მიიღეს გადაწყვეტილება, რომ 2020 წლის არჩევნებზე არ დააყენონ მაჟორიტარი კანდიდატები იმ ოლქებში, სადაც "ნაციონალური მოძრაობის ორი ძირითადი ფრთისა და მისი დანამატების გარდა" სხვა ოპოზიციური პარტიებს ან დამოუკიდებელ კანდიდატებს ექნებათ "გამარჯვების რეალური შანსი". კალაძე ბრიფინგიდან ისე გავიდა, რომ არც ის განმარტა, როგორ აპირებს პარტია განსაზღვროს, რომელ ოლქში არ უნდა დააყენონ კანდიდატი.

მას შემდეგ, რაც ქართული ოცნების ე.წ. აჯანყებულმა დეპუტატებმა ჩააგდეს საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო, ოპოზიციისა და სამოქალაქო აქტივისტების საერთო პროტესტი დაიწყო. დაპირისპირებული ოპოზიციური ჯგუფები ერთი მოთხოვნის ირგვლივ გააერთიადნენ — ვადამდელი არჩევნების პროპორციული სისტემითა და ე.წ. გერმანული მოდელით ჩატარება.