პარლამენტში პროპორციულ სისტემაზე გადასვლის კანონპროექტის ჩაგდებასთან ერთად სამოქალაქო სექტორი, ოპოზიციური პარტიები და აქციაზე შეკრებილი მოქალაქეები ალტერნატივად ე.წ. გერმანულ მოდელს ასახელებენ. ამ მოდელის უპირატესობაზე ევროპული საქართველოს ლიდერი, გიგა ბოკერია On.ge-ს ესაუბრა.

მისი თქმით, ე.წ. გერმანული მოდელის მთავარი უპირატესობა ისაა, რომ პარლამენტში ადგილები არჩევნებზე მიღებული ხმების შესაბამისად განაწილდება. გარდა ამისა, არ გაუქმდება მაჟორიტარული სისტემაც.

"ვერ გეყოლება იმაზე მეტი დეპუტატი, ვიდრე პროპორციულად მიიღებდი, ოღონდ მაჟორიტარები პირველები გადიან და მერე ემატებიან პროპორციული წესით გასულები", — აღნიშნავს ბოკერია.

ის განმარტავს, რომ ამ მოდელის საშუალებით, გამარჯვებული მაჟორიტარები იღებენ მანდატებს და შემდგომ მათ პარტიული სიიდან ემატებათ იმდენი დეპუტატი, რამდენიც მათ პროპორციის შესაბამისად ეკუთვნით.

განსხვავებული პოზიცია აქვთ ქართულ ოცნებაში. 16 ნოემბერს პარტიის ლიდერმა ია ვოლსკიმ განაცხადა, რომ ამ საკითხზე მმართველ პარტიაში დიდხანს არ უმსჯელიათ, რადგან ინიციატივა არ შეესაბამება მოქმედ კონსტიტუციას.

"ჩვენ დარწმუნებულები ვართ, რომ ადამიანებმა, ვინც ეს თემა წამოწიეს, კარგად იციან, რომ ეს არ მოხდება საკონსტიტუციო ცვლილების გარეშე, მიუხედავად ამისა, ცდილობენ, რომ ეს ნაპერწკალი როგორმე გადააქციონ ისეთ პროცესად, სადაც რეალობა, კანონი ჩაიკარგება ემოციებსა და სკანდალურობაში", — განაცხადა გია ვოლსკიმ.

ვადამდელი არჩევნების მოთხოვნით თითქმის 24 საათია პარლამენტის შენობა ბლოკირებულია. აქციის მონაწილეები ამბობენ, რომ არ შეუშვებენ არც ერთ დეპუტატს. შესასვლელებში გაიშალა კარვები და დააწყვეს ქვიშის ტომრები, ევროპულმა საქართველომ ყველა შესასვლელ ჭიშკარს სიმბოლურად ბოქლომი დაადო. აქციის მონაწილეებმა რამდენიმე წუთის წინ პარლამენტში არ შეუშვეს პარლამენტის დეპუტატები.

აქცია თბილისის ქუჩებში მას შემდეგ იმართება, რაც ბიძინა ივანიშვილის დაპირება არ შესრულდა. მმართველმა პარტიამ ჩააგდო საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო. მმართველი პარტიის ამ გადაწყვეტილებამ ოპოზიციური პარტიები საერთო მოთხოვნის ირგვლივ გააერთიანა. მოთხოვნას იზიარებენ სამოქალაქო სექტორის წარმომადგენლები და მოძრაობა #სირცხვილია.