ქართული ოცნების გენერალური მდივნის, კახა კალაძის განცხადებით, მიიღეს გადაწყვეტილება, რომ 2020 წლის არჩევნებზე არ დააყენონ მაჟორიტარი კანდიდატები იმ ოლქებში, სადაც "ნაციონალური მოძრაობის ორი ძირითადი ფრთისა და მისი დანამატების გარდა" სხვა ოპოზიციური პარტიებს ან დამოუკიდებელ კანდიდატებს ექნებათ "გამარჯვების რეალური შანსი". კალაძე ბრიფინგიდან ისე გავიდა, რომ ჟურნალისტების კითხვებს არ უპასუხა და უცნობია, როგორ აპირებს პარტია განსაზღვროს, რომელ ოლქში არ უნდა დააყენონ კანდიდატი.

"შედეგად უზრუნველვყოფთ მომავალი პარლამენტის მაქსიმალურ პოლიტიკურ მრავალფეროვნებას. გზას გავუხსნით ორგანიზაციულად სუსტ, მაგრამ ავტორიტეტის მქონე პოლიტიკურ ჯგუფებს და აქტიურ ადამიანებს, რათა მათ უშუალო და ქმედითი მონაწილეობა მიიღონ ხელისუფლების განხორციელების პროცესში", — განაცხადა კალაძემ ოცნებაში გამართული სხდომის შემდეგ.

გარდა ამისა, კალაძემ განაცხადა, რომ "თემა დახურულია" და 2020 წელს არჩევნები შერეული სისტემით ჩატარდება. ამის მიზეზად მან ის დაასახელა, რომ "უმრავლესობაში არსებული განწყობების გათვალისწინებით" ახალი საკონსტიტუციო ცვლილებებისთვის 113 ხმის მობილიზების რესურსი არ არსებობს.

2016 წლის არჩევნებით, პარლამენტში 75 მაჟორიტარიდან მხოლოდ ორი ოპოზიციონერი დეპუტატი იყო — სალომე ზურაბიშვილი, როგორც დამოუკიდებელი კანდიდატი და სიმონ ნოზაძე მრეწველების პარტიიდან. ამჟამად სიმონ ნოზაძე უმრავლესობის ფრაქციაშია გაერთიანებული, ხოლო სალომე ზურაბიშვილს საპრეზიდენტო არჩევნებში მმართველი გუნდი უჭერდა მხარს.

მას შემდეგ, რაც ქართული ოცნების ე.წ. აჯანყებულმა დეპუტატებმა ჩააგდეს საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო, ოპოზიციისა და სამოქალაქო აქტივისტების საერთო პროტესტი დაიწყო. დაპირისპირებული ოპოზიციური ჯგუფები ერთი მოთხოვნის ირგვლივ გააერთიადნენ — ვადამდელი არჩევნების პროპორციული სისტემითა და ე.წ. გერმანული მოდელით ჩატარება.

პროტესტის ფარგლებში პიკეტირებული იყო მთავარი საკანონმდებლო ორგანო, რომლის შესასვლელებიც ხელისუფლებამ სპეცრაზმისა და წყლის ჭავლის გამოყენებით გახსნა. აქციის დაშლის შემდეგ დააკავეს 37 აქტივისტი, მათ ნაწილს ადმინისტრაციული პატიმრობა შეუფარდეს.

ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. პროტესტის მონაწილეებმა სიმბოლურად უკვე "დააბოქლომეს" პროკურატურა, სახელმწიფო უსაფრთხოების სამსახური, მთავრობის კანცელარია, პრეზიდენტის ადმინისტრაცია და მმართველი პარტიის დეპუტატების ოფისები და ოლქები.

შეგახსენებთ, რომ პროპორციულ სისტემაზე გადასვლის პირობა ბიძინა ივანიშვილმა დადო, როდესაც 20-21 ივნისს განვითარებული მოვლენების გამო პროტესტი დაიწყო. პროპორციული სისტემა აქცია #სირცხვილიას მთავარი მოთხოვნა იყო.