ევროკავშირმა სირიის ქალაქ ალეპოში მომხდარ ხოცვა-ჟლეტაში პასუხისმგებლობა ნაწილობრივ რუსეთს დააკისრა.

როგორც EUobserver წერს, ევროკავშირის საგარეო საქმეთა მინისტრებმა, 17 ოქტომბრის შეხვედრის შემდეგ ერთობლივი განცხადება გაავრცელეს, სადაც წერია, რომ მას შემდეგ, რაც სირიის რეჟიმმა და მისმა მოკავშირე რუსეთმა თავდასხმები დაიწყეს ალეპოზე, საჰაერო დარტყმების ინტენსივობა და მასშტაბი არაპროპორციული გახდა, რაც შეიძლება ჩაითვალოს ომის დანაშაულად.

EUobserver-ის ცნობით, ევროპელი ლიდერების განცხადებით, რუსეთი საჰაერო დარტყმებისას არალეგალურ იარაღს იყენებს, როგორიცაა "კლასტერული ბომბები". რუსეთის მოკავშირე, სირიის პრეზიდენტი ბაშარ ალ ასადი კი დამნაშავეა ქიმიური იარაღის გამოყენებაში.

ევროკავშირის უმაღლესი წარმომადგენელი საგარეო პოლიტიკისა და უსაფრთხოების საკითხებში, ფედერიკა მოგერინი აღნიშნავს, რომ მათი მთავარი პრიორიტეტი ალეპოს დაცვაა:

"მტკიცედ მოვუწოდებთ რუსეთსა და სირიის რეჟიმს ცეცხლის შეწყვეტისკენ. მოვუწოდებთ, რომ განაგრძონ მოლაპარაკებები შეერთებულ შტატებთან და სხვა ძირითად მოთამაშეებთან. თავიდან აიცილონ კატასტროფა, განსაკუთრებით კი ჰუმანიტარული კატასტროფა".

მოგერინის თქმით, ევროკავშირი 18 ოქტომბრიდან დაიწყებს მოლაპარაკებებს თურქეთთან, ირანთან და საუდის არაბეთთან. გაგრძელდება მუშაობა სირიის სხვადასხვა ოპოზიციურ ჯგუფთან, მათ შორის სამოქალაქო საზოგადოებასთან, ქალებთან, ქრისტიან უმცირესობასთან და სხვებთან.

გაეროს სპეციალურმა წარმომადგენელმა სირიაში სტეფან მისტურამ განაცხადა, რომ 100 ათასი ბავშვია საომარ ხაზთან და ისინი უკვე ერთი თვეა ვერანაირ დახმარებას ვერ იღებენ:

"თუკი დეკემბრამდე ვერ გადავჭრით ალეპოს პრობლემას, იგი აღარ იარსებებს. ისტორია განგვსჯის, თუკი რუსეთ-სირიის კამპანია გაგრძელდება".

ევროკავშირი მოითხოვს დაუყოვნებლივი ზავის დადებას, რათა დახმარების კოლონამ მიაღწიოს საბრძოლო მოქმედებების ზონამდე. მათი გადაწყვეტილებით, რუსეთზე დამატებითი სანქციები არ დაწესდება, თუმცა სირიის რეჟიმის წარმომადგენლები შავ სიაში შევლენ.

საფრანგეთის საგარეო საქმეთა მინისტრმა ჟან-მარკ აურალტმა თქვა, რომ ევროკავშირის წევრი ქვეყნები არ გამოიყენებენ სამხედრო ძალას მკვლელობების შესაჩერებლად. მისი თქმით, ევროპამ პოლიტიკური ძალის მობილიზაცია უნდა მოახდინოს, რადგან თუკი ასადი თავის მიზანს მიაღწევს, რაც ალეპოს დაცემასა და მოსახლეობის გაჟლეტას გულისხმობს, ეს იქნება ლაქა ევროპის ისტორიაში:

"ჩვენ ცხადად ვუთხარით რუსეთს, რომ შეეჩერებინა ეს ხოცხა-ჟლეტა".