ქართული ოცნების ერთ-ერთი ლიდერი, ირაკლი კობახიძე პარლამენტთან მიმდინარე აქციის მონაწილეებს "კანონის დაცვისკენ" მოუწოდებს. მისივე თქმით, წინააღმდეგ შემთხვევაში ის შესაბამის ორგანოებს მიმართვს.

"მოვუწოდებ აქციის მონაწილეებს, კანონის შესაბამისად იმოქმედონ, წინააღმდეგ შემთხვევაში, მოვუწოდებ შესაბამის ორგანოებს რეაგირებისკენ", — თქვა კობახიძემ ქართული ოცნების ოფისში.

პარლამენტის შენობა ბლოკირებულია. აქციის მონაწილეები ამბობენ, რომ არ შეუშვებენ არც ერთ დეპუტატს. შესასვლელებში გაიშალა კარვები და დააწყვეს ქვიშის ტომრები, ევროპულმა საქართველომ ყველა შესასვლელ ჭიშკარს სიმბოლურად ბოქლომი დაადო.

აქცია თბილისის ქუჩებში მას შემდეგ იმართება, რაც ბიძინა ივანიშვილის დაპირება არ შესრულდა. მმართველმა პარტიამ ჩააგდო საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო. მმართველი პარტიის ამ გადაწყვეტილებამ ოპოზიციური პარტიები საერთო მოთხოვნის ირგვლივ გააერთიანა. მოთხოვნას იზიარებენ სამოქალაქო სექტორის წარმომადგენლები და მოძრაობა ქვეყნის სამსახურში.