ქართული ოცნების დეპუტატმა, აკაკი ზოიძემ ოკუპირებულ ცხინვალში დაკავებულ ექიმზე ისაუბრა ჟურნალისტებთან და თქვა, რომ ოკუპანტები კიდევ უფრო შორს წავიდნენ და არაადამიანურობის მწვერვალს მიაღწიეს:

"კაცობრიობის ისტორიაში ყველაზე დაუნდობელი ომების დროს, თეთრი ხალათი იყო ყოველთვის ხელშეუხებელი. ის რაც მოხდა ბატონ ვაჟა გაფრინდაშვილთან დაკავშირებით, ჩვენი სამედიცინო საზოგადოების ერთ-ერთი თვალსაჩინო წარმომადგენელთან, ჭეშმარიტ პატრიოტთან, პატიოსან ადამიანთან დაკავშირებით, ის აიყვანეს მძევლად ოკუპანტებმა... ჩვენ ყველაფერს ვაკეთებთ, კულუარულად, შიგნით გარეთ, ყველანაირი მეთოდებით, ოფიციალური თუ არაოფიციალური მეთოდებით... ყველამ ერთად მაქსიმალურად უნდა გავაძლიეროთ ზეწოლა".

ქართველ ექიმს, ვაჟა გაფრინდაშვილს საოკუპაციო რეჟიმმა ე.წ. საზღვრის კვეთის ბრალდებით ორთვიანი პატიმრობა შეუფარდა. დე-ფაქტო რეჟიმის საინფორმაციო სააგენტო რესის ინფორმაციით, საქმეზე საბოლოო გადაწყვეტილება არ დამდგარა და გამოძიება გრძელდება.

მათივე ინფორმაციით, 9-11 ნოემბერს ე.წ. საზღვრის კვეთის ბრალდებით საქართველოს 4 მოქალაქე დააკავეს. დე-ფაქტო სასამართლოს გადაწყვეტილებით, დაკავებულთაგან 3 პირს ფულადი ჯარიმა დააკისრეს და ე.წ. რესპუბლიკის ტერიტორია დაატოვებინეს, გაფრინდაშვილი კი დააპატიმრეს.

ვაჟა გაფრინდაშვილის ოჯახის წევრები ვარაუდობდნენ, რომ ექიმი ოკუპირებულ ტერიტორიაზეა ავადმყოფი ქალის დასახმარებლად გადავიდა, რომელიც თბილისში სამკურნალოდ ვერ ჩამოდიოდა. მათი აზრით, ექიმი სწორედ მაშინ დააკავეს.