ომბუდსმენი უზენაესი სასამართლოს მოსამართლეობის კანდიდატების შერჩევის წესის არაკონსტიტუციურად ცნობას ითხოვს. ამ საკითხზე სახალხო დამცველმა, ნინო ლომჯარიამ დღეს, 11 ნოემბერს ბრიფინგი გამართა.

სახალხო დამცველი მიიჩნევს, რომ იუსტიციის უმაღლეს საბჭოში მოსამართლეობის კანდიდატების შერჩევის წესი ეწინააღმდეგება საქართველოს კონსტიტუციით გარანტირებულ, მოქალაქის საჯარო თანამდებობის დაკავების (კონსტიტუციის 25-1), სამართლიან სასამართლოზე წვდომის უფლებებს (კონსტიტუციის 31-1 პირველი წინადადება) და დამოუკიდებელი და მიუკერძოებელი სასამართლოს უზრუნველმყოფელ პრინციპს (კონსტიტუციის 31-1). ნინო ლომჯარიას თქმით, საკონსტიტუციო სარჩელი ეფუძნება ვენეციის კომისიისა და ეუთოს რეკომენდაციებს.

"პრობლემატური იყო ორი საკითხი, პირველ რიგში ის, რომ მოსამართლეთა შერჩევის საკითხზე გადაწყვეტილებების ფარულად და დასაბუთების გარეშე მიღება ხდება. მეორე ის, რომ მათი გასაჩივრების შესაძლებლობა არ არსებობს. მიგვაჩნია, რომ შერჩევის წესი არ გამორიცხავს თვითნებობის საფრთხეს. სადავო ნორმით გათვალისწინებული ფარული კენჭისყრა არ ავალდებულებს იუსტიციის უმაღლეს საბჭოს, დაასაბუთოს თავისი გადაწყვეტილება", — აცხადებს სახალხო დამცველი.

ნინო ლომჯარიას თქმით, იმ შემთხვევაშიც კი, თუ საკონსტიტუციო სასამართლო შეაჩერებს საქმის სადავო ნორმებს, ეს მაინც ვერ შეაჩერებს პარლამენტში მიმდინარე პროცესს. მას ექნება გავლენა მომავალში გამოცხადებულ სამოსამართლეო ვაკანსიაზე.

უზენაეს სასამართლოში უვადოდ გასამწესებელი მოსამართლეების არჩევის პროცესი პარლამენტში დასრულდა. იუსტიციის უმაღლესმა საბჭომ 20-კაციანი სია 4 სექტემბერს დაამტკიცა. სიაში აღმოჩნდა ის ხუთი "სადავო" მოსამართლე, რომელიც პარლამენტში დეკემბერში წარდგენილ 10-კაციან სიაში იყო, მათ შორის, გიორგი მიქაუტაძე, ნინო ქადაგიძე, პაატა სილაგაძე, მერაბ გაბინაშვილი, თამარ ალანია. კანდიდატების ნაწილს არასამთავრობო ორგანიზაციები მურუსიძე-ჩინჩალაძის კლანის წევრებად მოიხსენიებენ.

შერჩეული 20 მოსამართლიდან უმრავლესობას მრავალწლიანი სამოსამართლეო გამოცდილება აქვს, ორი პროკურორია, ერთი კი იუსტიციის უმაღლესი საბჭოს დამოუკიდებელი ინსპექტორი.